Астанада Осиёда хавфсизлик ва ҳамкорлик форуми бошланди
Тадбир давомида сўзга чиққан Ташқи ишлар вазири Мурат Нуртилеу Осиёдаги сиёсий ва иқтисодий масалаларни муҳокама қилиш ва ўз таклифларини билдириш учун Астанада йиғилган экспертларга миннатдорчилик билдирди. Шунингдек, вазир Давлат раҳбари Қасим-Жомарт Тоқаевнинг форум иштирокчиларига йўллаган мактубини ўқиб эшиттирди.
«Ҳурматли форум иштирокчилари!
Пойтахтимизда юқори савияда ташкил этилган тадбирда сизларни кутиб олганимдан хурсандман. Бугунги мураккаб глобал вазиятда экспертлар ҳамжамияти билан бевосита ва очиқ мулоқот ўрнатиш жуда зарур. Бугун дунё мисли кўрилмаган муаммоларга дуч келмоқда. Биз глобал иқтисодий беқарорлик ва геосиёсий кескинлик кучайиб бораётганига гувоҳ бўлмоқдамиз. Бу масалалар ноаниқлик ва бошқа мафкуравий оқибатларга олиб келади. Бироқ, кенг кўламли инқирозлар жаҳон ҳамжамиятига, жумладан, Осиёга ҳам имкониятлар яратади. Шунинг учун ҳам биз умумий саъй-ҳаракатларимизни конструктив ғоялар ва хавфсизроқ, адолатли дунё яратишнинг янги усулларини топишга қаратишимиз муҳим. Бинобарин, бу жараёнда сиёсатшунослар, иқтисодчилар, етакчи экспертлар, таниқли эксперт марказлари, илмий тадқиқот институтлари ҳал қилувчи ўрин тутади», — дейилади Мурат Нуртилеу томонидан ўқилган Президент мактубида.
Форумда Осиё давлатларидан 60 дан ортиқ экспертлар иштирок этмоқда.
Эслатиб ўтамиз, мазкур тадбир Қозоғистон Республикаси Президенти ҳузуридаги Қозоғистон Стратегик тадқиқотлар институти ва Ташқи ишлар вазирлиги ҳамкорлигида ўтказилмоқда.
Муаллиф: Алихан Асқар
