Астанада “асиқ ату” бўйича биринчи жаҳон чемпионати бошланди
ASTANA. Kazinform – Астана шаҳрида “асиқ ату” бўйича жаҳон чемпионатининг тантанали очилиш маросими бўлиб ўтди. Бу ҳақда Астана ҳокимлиги расмий сайти хабар берди.
“Аспан” спорт мажмуасида ўтказилган тадбир Кўчманчилар асиқ спорти Халқаро федерацияси ва Республика «Асық ату» федерацияси томонидан Астана шаҳар ҳокимлиги кўмагида ташкил этилмоқда.
“Ҳурматли иштирокчилар ва меҳмонлар. Бугун «Асық ату» бўйича биринчи жаҳон чемпионати бўлиб ўтмоқда. Унинг қозоқ заминида ўтаётгани бежиз эмас. Иштирок этганингиз учун барчангизга раҳмат. Муваффақиятлар тилаб, бугунги мусобақани очиқ деб эълон қиламан”, – деди Мажилис депутати, Кўчманчилар асиқ спорти Халқаро федерацияси президенти Олжас Қуспеков.
Ташкилотчиларнинг фикрича, мазкур чемпионат қозоқ халқининг миллий анъаналари ва маданиятини жаҳон миқёсида кенг тарғиб қилиш йўлидаги муҳим қадамлардан бири бўлади.
“Бугун тарихий кун. Сабаби, Астанада асиқ ату бўйича илк жаҳон чемпионати бўлиб ўтмоқда. Асиқ ату қозоқ халқининг анъанавий ўйини. Ўйин эпчилликка, мерганликка, тезликка, ҳушёрликка ўргатади. Бир сўз билан айтганда, бу ўйиннинг кўп фойдаси бор”, – дейди “Асиқ ату” федерацияси ижрочи директори Азамат Манапов.
Очилиш маросимида иштирокчилар ва томошабинлар учун концерт дастурлари, миллий мусиқа ва рақс чиқишлари ташкил этилди. Шунингдек, йиғилганлар асиқ ату ўйини ҳақида тўлиқ маълумотга эга бўлиб, унинг нозик жиҳатлари билан яқиндан танишдилар.
Миллий спорт тадбирини ўтказишдан мақсад асиқ ату спортини жаҳон миқёсида оммалаштириш, халқаро спорт алоқаларини мустаҳкамлашдан иборат.
Астанада асиқ ату бўйича ўтказилаётган жаҳон чемпионатида 15 давлатдан энг сара спортчилар иштирок этмоқда.
Ғолиблар пул мукофотлари ва кубоклар билан тақдирланадилар.
Спорт мусобақасига Қозоғистон, АҚШ, Грузия, Венгрия, Россия Федерацияси, Руминия, Мўғулистон, Тожикистон, Туркия, Испания, Чехия, Ҳиндистон, Ўзбекистондан спортчилар ташриф буюрди.
