Астанада «Амстердам» майдони очилди
ASTANA. Kazinform – Нидерландия Бош вазири Марк Рюттенинг Қозоғистонга амалий ташрифи доирасида Астана шаҳрида «Амстердам» майдонининг очилиш маросими бўлиб ўтди.
Бу Марк Рюттенинг Қозоғистонга учинчи амалий ташрифидир. Унинг Астанага биринчи ташрифи 2010 йилда бўлган. Кейин 2015 йилда Қозоғистонга келган.
“Ҳар сафар кўрсатилган эътибор ва меҳмондўстлик учун раҳмат. Астанага қайтиб келганимдан жуда хурсандман. Бу шаҳар мени ҳар доим ўзининг қуввати, жадал ривожланиши ва ажойиб одамлари билан ҳайратга солади. Бугун бу шаҳарда бўлиш мен учун катта шараф! Бу кун Қозоғистон ва Нидерландия ўртасидаги мустаҳкам алоқани белгилайди. Ҳамкорлигимиз нафақат ҳукумат муҳитида, балки сув ресурсларини бошқариш соҳасида ҳам изчил такомиллашиб бормоқда. Биз икки мамлакат аҳолиси ўртасида бизнес ва жамоавий иш ривожига хизмат қиладиган дўстона муносабатлар ўрнатилганидан хурсандмиз. Шундай дўстлар қаторида эканлигимдан фахрланаман. Ушбу ажойиб кун учун сизга яна бир бор раҳмат айтмоқчиман”, – деди Марк Рютте майдоннинг очилиш маросимида.
2015 йилнинг кузида Нидерландиянинг энг йирик шаҳарларидан бири Роттердамда Астана майдони очилди. Бош вазир ўринбосари, Ҳукумат аппарати раҳбари Ғалимжан Қойшибаевнинг таъкидлашича, бугунги тадбир мамлакатлар ўртасидаги дўстона муносабатларнинг яна бир исботидир.
“Астанада «Амстердам» майдонининг очилиши Нидерландия ва Қозоғистон ҳамкорлигидаги муҳим воқеадир. Халқлар ўртасидаги мустаҳкам алоқаларни тасдиқловчи ва мамлакатлар ўртасидаги маданий алмашинувга ёрдам берувчи тадбир. Ҳамкорлигингизни қадрлаймиз. Шуни ҳам қайд этишни истардимки, Нидерландия сув тошқинларига қарши курашда биринчилардан бўлиб ёрдам қўлини чўзди. Нидерландия иқтисодиётимизга энг йирик инвестор ҳисобланади. Йиллар ўтган сари ҳамкорлигимиз мустаҳкамланишига ишонаман”, – деди Ғалимжан Қойшибаев.
