Astana Media Week: анъанавий медиа ҳафталиги бошланди
ASTANА. Кazinform – Қозоғистон пойтахтида Astana Media Week халқаро тадбири тантанали равишда очилди.
Бу йил анъанавий ҳафталик “Медиа таъсири ва рақамли уйғунлик” мавзусида ўтказилмоқда. Кейинги уч кун давомида етакчи экспертлар, халқаро ташкилотлар вакиллари, таниқли журналистлар соҳанинг долзарб масалаларини муҳокама қилади.
Шунингдек, халқаро медиа ташкилотлари вакиллари ва соҳа етакчилари глобал тенденциялар ва медиа коммуникациялари соҳасидаги ўз фикр-мулоҳазалари ва илғор тажрибалари билан ўртоқлашадилар. Бундан ташқари, тадбир доирасида 25 ва 26 сентябрь кунлари «Контент-Маркет» ўтказилади. У ерда телеканаллар ва продакшнлар илғор медиа лойиҳаларини тақдим этиши кутилмоқда.
Очилиш маросимида вазир ўринбосари Қанат Исқақов ҚР Маданият ва ахборот вазири Аида Балаева номидан табрик мактубини ўқиб эшиттирди.
“Ҳурматли ҳамкасблар, сизларни ҳар йили ўтказиладиган Astana Media Week ҳафталигининг очилиши билан чин қалбимдан табриклайман. Бу йилги “Медиа таъсири ва рақамли уйғунлик” мавзусига алоҳида эътибор қаратилиши жамиятдаги ўзгаришлар ва янги технологик даврда ахборотнинг аҳамиятини яна бир бор таъкидлайди. Медиа кундалик ҳаётда катта таъсирга эга, у нафақат ахборотни тарқатиш, балки жамоатчилик фикрини шакллантирадиган маданиятни ривожлантиришга ҳам ҳисса қўшади. Рақамли технологиялар жадал ривожланиб, ушбу тенденцияларни янги босқичга олиб чиқмоқда ва медианинг таъсирини янада кучайтирмоқда. Бу тенденциялар медиа мутахассисларининг малакасини ошириб, янги имкониятларга йўл очади. Astana Media Week медиа соҳасининг етакчилари, мутахассислар ва экспертлар бир жойда йиғилиб, долзарб масалаларни муҳокама қиладиган профессионал майдонга айланди. Барчангизга муваффақиятлар тилайман”, — дейилади табрик мактубида.
