Асосий вазифа — меҳнат унумдорлигини ошириш: Президент саноатдаги асосий тамойилни айтди
ASTANA. Kazinform — Ақордада Президент Қасим-Жомарт Тоқаев раислигида Сунъий интеллектни ривожлантириш бўйича кенгашнинг учинчи йиғилиши бўлиб ўтди.
Йиғилишда саноат секторини рақамли трансформация қилиш масалалари кўриб чиқилди.
Давлат раҳбари сунъий интеллект янги рақамли даврда рақобатбардошликни белгилайдиган асосий омиллардан бирига айланганини таъкидлади.
“БМТнинг Саноатни ривожлантириш бўйича 2026 йилги ҳисоботига кўра, сунъий интеллект жаҳон иқтисодиёти қиёфасини ўзгартираётган бешта трансформацион мегатренддан бири сифатида эътироф этилган. Сўнгги беш йилда сунъий интеллект билан боғлиқ патентлар улуши қарийб уч баробар ошди. Бу фундаментал технологик ўзгаришлар юз бераётганидан далолат беради. Энди нафақат табиий ресурслар, капитал ва бозорлар учун, балки ишлаб чиқариш самарадорлиги учун ҳам рақобат кучаймоқда. Қозоғистон бу имкониятларни қўлдан бой бермаслиги керак. Асосий вазифа — меҳнат унумдорлигини ошириш, технологик янгиланишни жадаллаштириш ва қўшилган қиймати юқори бўлган маҳсулотлар ишлаб чиқаришни кенгайтириш. Бу вазифаларни амалга оширишда сунъий интеллект асосий воситалардан бири бўлиши керак”, — деди Президент.
Қасим-Жомарт Тоқаев 2029 йилгача мўлжалланган Digital Kazakhstan стратегияси доирасида аниқ иқтисодий натижаларга эришишни мақсад қилган сунъий интеллектнинг миллий комплекс экотизими шакллантирилаётганига тўхталди.
“Жорий йилнинг дастлабки саккиз ойида саноатдаги ишлаб чиқариш ҳажми қарийб 46 триллион тенгени ташкил этди. Қайта ишлаш саноати ўтган йилнинг шу даврига нисбатан 8,4 фоизга ўсди. Бироқ иқтисодий ўсишнинг юқори суръатларини сақлаб қолиш учун меҳнат унумдорлигини ошириш, саноат базасини модернизация қилиш ва қўшилган қиймати юқори маҳсулотлар ишлаб чиқаришга эътибор қаратиш зарур. Бу мақсадга эришишда сунъий интеллектнинг роли алоҳида аҳамиятга эга. Сунъий интеллектнинг ҳақиқий қиймати шундаки, у инсон салоҳиятини кучайтиради. Яъни сунъий интеллект муҳандисларга аниқ қадамлар ташлаш, иш самарадорлигини ошириш, раҳбарларга эса зарур пайтда таҳлилий маълумотларга таянган ҳолда тезкор ва тўғри қарорлар қабул қилиш имконини беради. Саноат соҳасидаги сиёсатимиз айнан шу тамойилга асосланган”, — деди Давлат раҳбари.
