Армия спортчилари Бутунжаҳон кўчманчилар ўйинларида 5 та олтин медални қўлга киритди
ASTANA. Kazinform – Мусобақанинг иккинчи кунида ҚР Мудофаа вазирлиги марказий спорт клуби жамоаси 5 та олтин ва 1 та кумуш медални қўлга киритди.
Армия спортчилари қозоқ кураши, жамби отиш ва кураш мусобақаларида муваффақиятли иштирок этди.
“Бутунжаҳон кўчманчилар ўйинларида беш спорт тури бўйича 14 нафар армия спортчиси ғолиблик учун куч синашмоқда. Улар икки кун ичида олтита медални қўлга киритишди. Бу полвонларимиз ўз кучларини синаб кўришлари учун ажойиб имконият. 2025 йилда Астана шаҳрида Халқаро ҳарбий спорт кенгаши (CISM) томонидан қозоқ кураши бўйича жаҳон чемпионати бўлиб ўтади. Ушбу мусобақага ушбу ташкилот вакилларини махсус таклиф қилдик. Биз учун бу ҳарбий спортчилар ўртасида қозоқ кураши мусобақасига тайёргарлик кўриш ва уни тарғиб қилишнинг муҳим босқичларидан биридир”, – деди ҚР Мудофаа вазирлиги спорт қўмитаси раиси, Марказий спорт клуби раҳбари полковник Арман Абеуов.
Жамби отиш бўйича Осиё услубида ўтказилган мусобақада Қозоғистон Республикаси Қуролли Кучлари ҳарбий хизматчиси Батир Бексаут чемпион бўлди. Ушбу спорт турида 27 давлатдан жами 78 нафар спортчи куч синашди.
Дунёнинг 9 давлатидан 64 нафар спортчи иштирок этган мусобақада 70 килограмм вазн тоифасида Қозоғистон Республикаси Қуролли Кучлари ҳарбий хизматчиси Алмат Латипбек олтин медални қўлга киритди.
Вакиллик жамоаси қозоқ кураши мусобақасида иштирок этиш учун тузилган. Унга саккиз вазн тоифасида 41 давлатдан 274 нафар спортчи (эркаклар ва аёллар) ариза топширди. Кураш баҳси Жақсилиқ Ушкемпиров саройида бўлиб ўтмоқда. Мусобақада Бекжан Тўлепов (55 кг), Жумажан Қожамбеков (74 кг) ва Бақит Қусақбаев (60 кг) ғолиб бўлди.
Дунёнинг 27 давлатидан 106 нафар спортчи иштирок этган кураш мусобақасида армия полвони катта лейтенант Марат Байқамуров 100 килограммдан ортиқ вазн тоифасида кумуш медални қўлга киритди.
