Арманистонлик экспертлар Қозоғистоннинг ривожланишини муҳокама қилдилар
ASTANА. КAZINFORM - Қозоғистоннинг Арманистондаги Элчихонасида мамлакат экспертлари, журналистлар, бизнес ва сиёсий гуруҳлар вакиллари билан учрашув бўлиб ўтди. Давра суҳбати иштирокчилари замонавий Қозоғистоннинг ривожланиш масалаларини муҳокама қилдилар ва икки томонлама кун тартиби юзасидан фикр алмашдилар.
Қозоғистоннинг Арманистондаги Элчиси Болат Иманбаев давра суҳбати иштирокчиларига Қозоғистонда сиёсий, ижтимоий-иқтисодий ва демократик ислоҳотлар мажмуасини амалга ошириш жараёни, инсон ҳуқуқларини мустаҳкамлаш чора-тадбирлари ҳақида сўзлаб берди. Улар Қозоғистон Президенти Қасим-Жомарт Тоқаевнинг жорий йил 3 январь куни Egemen Qazaqstan газетасига берган интервьюсининг асосий мазмуни билан танишдилар.
Шунингдек, меҳмонларга Қозоғистоннинг турли тармоқларида 2023 йилда эришилган асосий натижалар ва сарҳисоблар, инсон ҳуқуқларини ҳимоя қилиш бўйича аниқ чора-тадбирлар, Қасим-Жомарт Тоқаев президентлигининг натижалари ҳақида кўргазмали материаллар тақдим этилди.
Арманистонлик экспертлар Қозоғистон раҳбарияти демократик тамойиллар, умумий мақсадларга эришиш, инсон ҳуқуқларини таъминлаш, ўрнатилган салбий анъаналарни йўқ қилиш йўлида жамиятни бирлаштиришга бел боғлаганини қайд этди.
“ХХI аср – имкониятлар асри. Қозоғистон етакчи давлатлар рўйхатидан жой олишга тўлиқ ҳаққи борлигини исботлади. Муваффақият гарови халқнинг ҳамжиҳатлигидир. Ҳудудлар ва инфратузилмани ривожлантириш борасидаги ислоҳотлар ҳам алоҳида таассурот қолдирди”, — дея “Альтернатива” таҳлил маркази раҳбари, сиёсий иқтисод бўйича эксперт Татул Манасерян Қозоғистонга ташрифини сарҳисоб қилди.
Глобаллашув ва ҳамкорлик таҳлил маркази раҳбари Степан Григорянга кўра, Қозоғистоннинг демократик давлат қуриш йўлидаги ютуқлари кўнгилни қувонтиради.
“Қозоғистон Президенти психологияни ўзгартириб, давлат ривожига салбий таъсир кўрсатган салбий анъаналарни йўқ қилмоқда. Муҳим демократик ислоҳотлар амалга оширилмоқда. Миллий қурултой эса қадимий анъаналарни сақлайдиган қимматли мулоқот майдонидир”, - деди эксперт.
Тадбир доирасида “Январь. Давлат тўнтариши ҳаракати” ҳужжатли фильми намойиш этилди. Учрашувнинг сўнгги қисмида эса икки томонлама кун тартибига доир масалалар муҳокамаси ўтказилди ва бу томонларда қизиқиш уйғотди.
