Арманистон Туркия билан иккита чегара ўтказиш пунктини очмоқчи
ASTANA. Kazinform — 2026-2031 йилларга мўлжалланган Арманистон ҳукумати дастури лойиҳасида Туркия билан муносабатларни нормаллаштиришга қаратилган чора-тадбирлар, жумладан, Арманистон–Туркия чегарасини очиш ва камида иккита замонавий чегара ўтказиш пунктини ишга тушириш режаси кўрсатилган, деб хабар беради агентликнинг минтақадаги мухбири.
Тегишли ҳужжат 20 августда бўлиб ўтган Арманистон ҳукумати йиғилиши кун тартибига «Арманистон Республикаси Ҳукумати дастури тўғрисида»ги масала сифатида киритилди. Дастур лойиҳаси, унинг асослари ва мазкур масалага илова расмий электрон ҳукумат порталида эълон қилинган.
Дастур лойиҳасида Арманистон ва Туркия ўртасида дипломатик муносабатлар ўрнатиш, Арманистон–Туркия чегарасини очиш ва «камида иккита замонавий чегара ўтказиш пункти»ни ишга тушириш, шунингдек, транспорт, энергетика ва рақамли инфратузилмани қайта ишга тушириш ҳамда икки томонлама савдо муносабатларини ривожлантириш режаси кўрсатилган.
Бироқ ҳужжатда қайси чегара ўтказиш пунктлари ишга туширилиши режалаштирилаётгани ёки уларни ишга туширишнинг аниқ муддатлари кўрсатилмаган. Айни пайтда Арманистон ва Туркия ўртасидаги қуруқлик чегараси махсус келишув бўлмаса, учинчи давлат фуқаролари ва юк ташиш учун ёпиқ.
Арманистон ва Туркия 2022 йилдан буён муносабатларни нормаллаштириш бўйича музокаралар олиб бормоқда. Чегарани очиш ва транспорт алоқаларини тиклаш масалалари ҳам муҳокама қилинмоқда.
