Археологлар Колизей яқинида Рим давридаги мозаикали уйни топдилар
Италия Маданият вазирлиги Қадимги Рим давридаги қасрни “ҳақиқий хазина” деб атади. Ундаги мозаика айниқса қимматлидир, дея хабар беради Кazinform агентлиги Euronewsга таяниб.
Италиялик археологлар машҳур Колизейдан унча узоқ бўлмаган жойда, чиғаноқлар, мармар ва қимматбаҳо ойналардан иборат ғайриоддий мозаика билан безатилган Қадимги Рим даврига оид ягона турар жойни топдилар.
Италия маданият вазири Женнаро Санжулиано ҳашаматли қароргоҳни милоддан аввалги II асрнинг иккинчи ярмига оид деб атаган.
Мозаикада учта катта кема тўлқинлар бўйлаб деворлари кичик миноралар ва айвонлар билан безатилган қирғоқ шаҳрига қараб сузиб ўтмоқда, бу эса 2000 йилдан ошиқ уй эгаси жангда ғалаба қозонганини кўрсатади.
Археологлар биринчи марта 2018 йилда бир нечта деворларни топдилар. Бугунги кунга қадар фақат айрим хоналар қазилган, қазиш ишлари 2024 йилгача давом этади.
Маданият вазирлиги вакилларининг сўзларига кўра, атриум атрофида жойлашган домуснинг асосий хонаси ёз ойларида ишлатилган гротто сифатида стилизация қилинган банкет залидир.
Уй эгаси, зодагон, эҳтимол сенатор, безатилган деворлар орасига ётқизилган қўрғошин қувурлари туфайли меҳмонларни "ажойиб сув ўйинлари" билан хурсанд қилган.
Мозаика кўплаб чиғаноқлардан, Миср кўк тессераларидан, кельт услубидаги тридентлар, ҳарбий кемалар ва карнайлар тасвирланган қимматбаҳо шиша ва оқ мармар парчаларидан иборат.
Айниқса, ток ва нилуфар барглари билан ўралган кичик миноралари ва айвонлари бўлган қирғоқ бўйидаги шаҳар қиёфаси катта қизиқиш уйғотади.
