Америкалик IT гиганти Қозоғистонда сунъий интеллект бўйича таълим дастурларини ишга туширади
ASTANA. Kazinform – ҚР Рақамли ривожланиш, инновациялар ва аэрокосмик саноат вазирлиги ва NVIDIA Қозоғистон таълим муассасаларида сунъий интеллект бўйича таълим дастурларини йўлга қўйишга келишиб олди, дея хабар беради Кazinform вазирлик матбуот хизматига таяниб.
ҚР Рақамли ривожланиш, инновациялар ва аэрокосмик саноат вазирлиги делегацияси компаниянинг Сан-Францискодаги бош қароргоҳига ташриф буюрди. Уларга бутун маҳсулотлар қатори, жумладан, сўнгги инқилобий Blackwell чипи намойиш этилди. Учрашувда сунъий интеллект ва суперкомпьютер технологиялари соҳасидаги ҳамкорлик истиқболлари муҳокама қилинди.
Музокаралар натижасида Қозоғистон таълим муассасаларида Deep Learning Institute дастури доирасида сунъий интеллект бўйича таълим дастурларини йўлга қўйиш бўйича келишувга эришилди. Таълим мазмунини қозоқ тилига маҳаллийлаштириш ҳам амалга оширилади.
Бундан ташқари, ушбу соҳадаги иқтидорли ёш мутахассисларни аниқлаш ва қўллаб-қувватлаш мақсадида сунъий интеллект бўйича хакатонлар ва буткемплар ўтказилиши режалаштирилган. Ушбу тадбирлар ёшларда рақамли кўникмаларни ривожлантиришга ва Қозоғистоннинг минтақадаги инновациялар маркази сифатидаги мавқеини мустаҳкамлашга ёрдам беради.
NVIDIA (NVIDIA Corporation) - Америка технология компанияси, чипда (SoC) график ишлов бериш блоклари ва тизимларини ишлаб чиқарувчиси. 3 триллион долларлик бозор капиталлашувига эришган тарихдаги биринчи компьютер чиплари компанияси. Ушбу кўрсаткич бўйича компания Appleдан ўзиб кетди ва Microsoft корпорациясидан кейин иккинчи ўринни эгаллади. Компанияда ходимларнинг тахминан 30 фоизи 20 миллион долларлик соф бойликка эришди.
