Америкалик аскар ўз ихтиёри билан Шимолий Корея чегарасини кесиб ўтди
АҚШ армияси вакили ҳибсга олинган шахс оддий аскар Трэвис Кинг эканлигини тасдиқлади.
Манбага кўра, у аввал Жанубий Кореядаги Кэмп Хамфриз тартиб-интизом бўлимида хизмат қилган ва қуролли кучлардан бўшаш учун АҚШга кетаётган эди.
Паспорт назоратидан ўтгандан кейин у йўлини топиб, қайтиб келган.
Шундай қилиб, у Шимолий Корея билан чегарадаги демилитаризация зонасига экскурсия сафарига қўшилган.
Бу жанубий кореяликлар ва сайёҳлар учун жозибадор сайёҳлик маскани ҳисобланади.
Давлат департаменти ва АҚШ Мудофаа вазирлиги Трэвис Кинг ўша экскурсия вақтида чегарани ўз ихтиёри билан кесиб ўтганини айтди.
Бироқ, ҳали ҳеч бир идора унинг армиядан қочиб кетганини даъво қилмаган.
Ушбу экскурсия иштирокчиларидан бири CBS телеканалига аскар табассум билан Шимолий Кореяга қочиб кетганини айтди.
«Аввалига бу ҳазил деб ўйладим, лекин у қайтиб келмади. Шундагина мен йигит ҳазил қилмаётганини англадим», – дейди у.
Давлат департаменти матбуот котиби Мэттью Миллернинг айтишича, департамент Пентагон билан алоқада ва агар керак бўлса, ҳар қандай ёрдам кўрсатишга тайёр.
Аскарнинг исми дастлаб сир тутилган, чунки Оқ уй аввало унинг қариндошларини хабардор қилишни афзал кўрган.
Бироқ, кўп ўтмай, бир қанча ахборот агентликлари бу одамнинг исми Трэвис Кинг эканлигини ва у АҚШ армиясининг иккинчи даражали оддий аскари эканлигини эълон қилди.
