АҚШнинг йирик банкларида оммавий техник носозлик юз берди

ASTANA. Kazinform — АҚШдаги бир қатор йирик банклар мижозлари онлайн хизматлардан фойдаланишда қийинчиликларга дуч келди. Бунинг оқибатида айрим фойдаланувчилар ўз ҳисоб рақамларига кира олмаган ва молиявий операцияларни амалга оширишда муаммоларга дуч келган. Бу ҳақда DW хабар бермоқда.

АҚШнинг йирик банкларида оммавий техник носозлик юз берди
Фото: Kazinform/СИ

Downdetector маълумотларига кўра, фойдаланувчилар Bank of America, Chase, J.P. Morgan, U.S. Bank, Wells Fargo банклари ҳамда Zelle тўлов сервисининг ишида носозликлар кузатилгани ҳақида хабар беришган.

Chase банки вакиллари ушбу ҳолат киберҳужум билан боғлиқ эмаслигини, балки техник носозлик сабабли юзага келганини маълум қилди.

“Техник носозлик туфайли айрим транзакцияларни қайта ишлаш одатдагидан кўпроқ вақт талаб қилмоқда. Шунга қарамай, мижозлар ўз ҳисоб рақамлари ва маблағларидан фойдаланиш имкониятига эга. Биз муаммони имкон қадар тезроқ бартараф этиш устида иш олиб бормоқдамиз”, — дейилади банк баёнотида.

Мазкур хабарлар Microsoft компаниясида 13 ноябрда юз берган кенг кўламли техник носозликдан бир неча кун ўтиб эълон қилинди. Ўшанда компаниянинг Outlook, Teams ва Copilot каби бир қатор хизматлари бир неча соат давомида ишламаган эди.

Ҳозирча ушбу икки ҳодиса ўртасида ўзаро боғлиқлик бор-йўқлиги номаълум.