АҚШнинг Пенсильвания штатида сайловолди кампанияси чоғида Дональд Трампга суиқасд қилинди
ASTANА. Кazinform — АҚШ президентлигига номзод Дональд Трамп Пенсильванияда сайловолди ташвиқоти чоғида нутқ сўзлаётганида ўқ овозлари эшитилди. У гапини узиб, майдонни тарк этди. BBCнинг округ прокурорига таяниб хабар беришича, ўқ узган шахс ўлдирилган, митингда қатнашган яна камида бир киши ҳалок бўлган.
Отишма бошланиши билан Трамп подиумга энгашган ва тансоқчилар уни олиб кетишга шошилган. Кетишдан олдин сиёсатчи муштли қўлини силкитди. Видеода Трампнинг ўнг қулоғи қонга беланганини кўриш мумкин.
Трампни ҳимоя қилиш учун масъул бўлган Махфий хизмат баёнотида ҳужумчи "митинг майдончаси ташқарисидаги баланд жойдан" саҳна томон бир нечта ўқ узганини айтди.
— АҚШ Махфий хизмати ўқ отувчини зарарсизлантирди, у ҳалок бўлди. АҚШ Махфий хизмати тезда ҳимоя чораларини кўрди ва собиқ президент Трамп хавфсиз. Бир сайловчи ҳалок бўлди, икки нафари оғир яраланди. Воқеа юзасидан суриштирув ишлари олиб борилмоқда. Махфий хизмат ФҚБни хабардор қилди, - дейилади хабарда.
Ўқ отувчининг шахси ҳозирча ошкор этилмаган.
Дональд Трамп митингидаги отишма суиқасд сифатида текширилмоқда, дея хабар бермоқда Ассошиэйтед Пресс икки ҳуқуқ-тартибот идораси вакилига таяниб.
Трамп билан воқеадан тахминан 2,5 соат ўтиб боғланган.
“Менга ўқ тегди, ўнг қулоғимнинг юқори қисмини тешиб ўтди”, — деди Трамп. — Мен нимадир нотўғри эканлигини дарҳол англадим, ҳуштак овозини эшитдим, ўқ овози эшитилди ва ўқ теримга текканини дарҳол ҳис қилдим. Қаттиқ қон кета бошлади, шунинг учун нима бўлаётганини тушундим".
У АҚШ Махфий хизмати ва барча ҳуқуқ-тартибот идораларига тезкор жавоб учун миннатдорчилик билдириб, митингда ҳалок бўлганлар ва жароҳатланганларнинг оила аъзоларига ҳамдардлик билдирди.
“Мамлакатимизда бундай ҳаракатнинг бўлиши ажабланарли”, - деб ёзган Трамп.
Байденнинг реакцияси
“Президент Байден воқеа ҳақида маълумот олди”, — дейилади Оқ уй хабарида.
Брифингни Махфий хизмат ва Миллий хавфсизлик департаменти раҳбарлари, шунингдек, Байденнинг ички хавфсизлик бўйича маслаҳатчиси ўтказди.
— Менга Пенсильванияда Дональд Трампнинг митингида отишма бўлгани ҳақида хабар беришди. Унинг хавфсиз эканлигидан хурсандман. Унга, унинг оиласига ва митингда қатнашган барча учун дуо қиламан. Маълумот кутамиз. Жилл ва мен Махфий хизматга унинг хавфсизлиги учун миннатдорчилик билдирамиз. Америкада бундай зўравонликка ўрин йўқ. Бутун халқ бирлашиб, бу зўравонликни қоралаши керак, - деди у.
Вице-президент Камала Харрис ҳам воқеа ҳақида маълумот олди.
Исроил Бош вазири Биньямин Нетаньяху биринчи бўлиб муносабат билдирган хорижий етакчилардан бири бўлди.
"Сара ва мен президентликка номзод Трампга қилинган ҳужумдан ҳайратдамиз ва унинг хавфсизлиги ва тезроқ тузалиб кетиши учун дуо қиламиз", - деб ёзади у Х саҳифасида.
Дунё бўйлаб сиёсатчиларга суиқасд уринишларининг кўпайиши
Мутахассисларнинг қайд этишича, сўнгги йилларда дунё бўйлаб сиёсий қотиллик ва ўлим хавфи кучайган.
Ўтган йили Эквадор президентлигига номзод Фернандо Вильявисенсио Китода ўлдирилган эди.
Аргентина вице-президенти Кристина Фернандес де Киршнер суиқасддан омон қолди, бироқ ҳужумчининг ўқига тегди.
Япония бош вазири Синдзо Абэ қўлбола портловчи қурилмадан ҳалок бўлди.
Йил бошида Жанубий Корея мухолифати етакчиси Ли Чжэ Мён бўйнидан яраланган, баҳорда эса Словакия бош вазири Роберт Фицо суиқасддан омон қолган эди.
Қўшма Штатларда бундай шов-шувли ишлар бўлмаган, аммо Американинг юқори мартабали амалдорларига таҳдидлар тез-тез бўлиб туради.
«Нью-Йорк Таймс» газетаси ўтган йили полиция Конгресс аъзоларига нисбатан 8000 дан ортиқ таҳдидларни текширгани ва федерал судьяларга ҳам таҳдидлар қилингани ҳақида хабар берди.
Ўтган йилнинг октябрь ойида америкаликларнинг деярли тўртдан бир қисми “ватанпарварлар мамлакатни қутқариш учун зўравонликка мурожаат қиладилар” деган баёнотга рози бўлган (сўров ўтказилган уч йил ичидаги энг юқори натижа).
