АҚШнинг дрон ҳужуми оқибатида ИШИД етакчиларидан бири ҳалок бўлди
Сурия шимоли-ғарбида учувчисиз самолёт ҳужуми натижасида ИШИД гуруҳининг беш етакчисидан бири бўлган Маҳер ал-Ағал ҳалок бўлди, унинг гуруҳининг юқори мартабали амалдори сифатида кўрсатилган яқин иттифоқчиси оғир яраланди. Бу ҳақда сешанба куни АҚШ Марказий қўмондонлиги тарқатган баёнотда маълум қилинди.
«Операция муваффақиятли амалга оширилишини таъминлаш учун эҳтиёткорлик билан режалаштирилган эди. Дастлабки таҳлиллар тинч аҳоли орасида қурбонлар йўқлигини кўрсатмоқда», — дейилади хабарда.
Шунингдек, ал-Ағал Ироқ ва Суриядан ташқарида ИШИД тармоқларини ривожлантириш учун масъул бўлганини таъкидлайди.
Мухолифат назорати остидаги ҳудудларда фаолият олиб бораётган Сурия фуқаролик мудофааси гуманитар ташкилоти, Ҳалаб вилояти шимолидаги Халтан қишлоғида номаълум учувчисиз аппаратнинг мотоциклга зарба бергани ва икки кишининг ҳалок бўлганини маълум қилди.
«ИШИД АҚШ ва минтақадаги ҳамкорларига таҳдид солишида давом этмоқда», - деди АҚШ Марказий қўмондонлиги вакили полковник Жо Буччино.
Унинг қўшимча қилишича, АҚШ Марказий қўмондонлиги минтақада етарли ва барқарор мавжудликни сақлаб қолади ва минтақавий хавфсизликка таҳдидларга қарши туришда давом этади.
Операция ИШИД гуруҳининг катта ҳудудларни йўқотиб, партизан бўлинмаларига қайта ташкил этиш уринишларига навбатдаги зарба бўлди.
Унинг натижаларини АҚШ президенти Жо Байден қайд этди.
Оқ уй веб-сайтида эълон қилинган баёнотда таъкидланишича, ал-Ағалнинг йўқ қилиниши ИШИДнинг минтақада ўз операцияларини режалаштириш, ресурслар билан таъминлаш ва ўтказиш қобилиятини сезиларли даражада камайтиради.
Айни пайтда АҚШ Сурияда, асосан, мамлакат шарқида 900 га яқин аскардан иборат ҳарбий контингентга эга.
Июн ойи ўрталарида халқаро коалиция кучлари ИШИД гуруҳининг юқори мартабали аъзосини қўлга олиш бўйича операция ўтказган эди.
Фото: Reyters.cоm
Муаллиф: Арсен Утешев
