АҚШдаги вазият бутун дунё бўйлаб 84 миллионга яқин иш ўринларига таъсир қилади - БМТ
АSTANА.Кazinform - Халқаро меҳнат ташкилотининг (ХМТ) жорий йил учун янгиланган бандлик прогнозига кўра, бутун дунё бўйлаб 53 миллион иш ўрни яратилади, деб хабар беради БМТ янгиликлари.
Бу аввалроқ прогноз қилинган кўрсаткичдан етти миллионга кам.
Жаҳон бандлик ва ижтимоий прогнозлар ҳисоботига кўра, иш ўринлари ўсишининг секинлашишига олиб келадиган асосий омиллар геосиёсий кескинликлар ва глобал савдодаги узилишлардир. 2025 йилда бандлик ўсиши прогнози 1,7 фоиздан 1,5 фоизга қисқартирилди, бу етти миллионга яқин қўшимча иш ўринларига тенг.
Бу пасайиш глобал ялпи ички маҳсулотнинг ўсиши олдинги прогноз 3,2 фоизга нисбатан 2,8 фоизга секинлашганини кўрсатади.
ХМТ ҳисоб-китобларига кўра, дунёнинг 71 мамлакатидаги тахминан 84 миллион иш ўрни АҚШдаги истеъмол талаби билан бевосита ёки билвосита боғлиқ. Ушбу иш ўринлари ва улар ишлаб чиқарадиган даромадлар энди савдо кескинлиги туфайли узилиш хавфи остида.
— Жаҳон иқтисодиёти биз кутганимиздан ҳам секинроқ ўсмоқда, — деб тушунтирди ХМТ Бош директори Жильбер Унгбо. - Агар биз геосиёсий кескинликлар ва савдо узилишлари каби муаммоларни ҳал қилмасак, глобал меҳнат бозорига салбий таъсир кучаяди.
Ҳисобот муаллифлари даромад тақсимотидаги хавотирли тенденцияларга ҳам ишора қиладилар: бутун дунё бўйлаб ишчилар ҳиссасига тўғри келадиган ЯИМ улуши 2014 йилдаги 53 фоиздан 2024 йилда 52,4 фоизгача пасайган. Агар бу улуш ўзгаришсиз қолса, 2024 йилда глобал меҳнат даромади бир триллион долларга ошарди.
Эслатиб ўтамиз, аввалроқ дунёдаги иш жойларининг тахминан 25 фоизига сунъий интеллект таъсир қилиши мумкинлиги ҳақида хабар берган эдик.
