АҚШдаги тарихий сайловда Джо Байден ғалабага тобора яқинлашиб келмоқда

VASHINGTON. Kazinform – Америка Қўшма Штатларида президентлик сайловида берилган овозларни санаш давом этмоқда. АҚШнинг амалдаги президенти, республикачи Дональд Трамп ва Демократик партиядан номзод ва мамлакатнинг собиқ вице-президенти Джозеф Байден давлат раҳбари лавозими учун курашмоқда, деб хабар бермоқда Kazinform CNN телеканалига асосланиб.

Сайловда ғалаба қозониш учун номзодлардан бири камида 270 сайловчи вакилнинг овозига эга бўлиши керак.

Ҳозирга қадар, CNN маълумотларига кўра, Байден 253 сайловчи вакилнинг овозига эга ва Fox News маълумотларига кўра, сайлов коллегиясининг 264 аъзоси демократ номзодга овоз берган. Демак, Байденга ғалаба қозониш учун атиги 6 та овоз керак. Оқ уйнинг амалдаги раҳбари Дональд Трампга келсак, CNN ва Fox News тегишинча 214 ва 213 та овоз тўплаганини қайд этган.

Овозларни санаш бир қатор штатларда, хусусан Невада, Пенсилвания, Джорджия, Шимолий Каролина ва Аляскада давом этмоқда. CNN хабар беришича, масалан, Пенсилванияда овозларни санаш жума кунигача давом этиши мумкин, чунки баъзи сайловчилар ўз бюллетенларини почта орқали юборишган.

Ушбу сайловлар Қўшма Штатлар учун ҳақиқатан ҳам тарихий аҳамиятга эга. The Guardian нашрининг таъкидлашича, ушбу сайловда сайловчилар фаоллиги бўйича рекорд янгиланади. Охирги ҳисоб-китобларга кўра, овоз бериш ҳуқуқига эга бўлган америкаликларнинг 67 фоиздан кўпроғи сайловда қатнашган. Сайловчиларнинг бундай фаоллиги сўнгги 120 йил ичида кузатилмаган.

Яна бир рекорд демократлар номзоди Джо Байден томонидан янгиланди, у тарихда энг кўп сайловчи овозини тўплаган. АР маълумотларига кўра, Байден фойдасига камида 72 миллион одам овоз берган.

Яъни, ҳозирги демократ номзод 2008 йилда 66 миллиондан ортиқ овоз олган собиқ президент Барак Обамани ва 2016 йилда 62 миллиондан зиёд бюллетен йиққан амалдаги президент Доналд Трампни ортда қолдирди. Шуни ёдда тутиш керакки, ғолиб сайловчилар эмас, балки сайловчи вакилларнинг овозлари асосида белгиланади.

Яна бир тарихий ҳолат шундаки, сайловда ким ғолиб бўлишидан қатъий назар, ушбу сайловда АҚШ тарихидаги энг кекса президент сайланади. 2016 йилда 70 ёшли Трамп АҚШнинг энг кекса президенти бўлганди. Июнь ойида 74 ёшга тўлган Трамп 77 ёшли Байден билан президентлик учун курашмоқда.