АҚШда сайлов кампанияси бошланади
ASTANА. Кazinform - АҚШда сентябрь ойининг биринчи душанбасида нишонланадиган Меҳнат куни сайлов мавсумини очди. Биринчи бюллетенларни почта орқали юбориш жума куни бошланади.
Президентлик сайловининг илк дебатлари 10 сентябрда бўлиб ўтади, баъзи штатларда эса муддатидан олдин овоз бериш 20 сентябрда бошланади, деб хабар беради “Америка Овози”.
Кимлар овоз беради?
Сайлов бюллетенларининг биринчи тўлқини федерал қонун талабига кўра, сайловдан 45 кун олдин, 21 сентябрь куни ҳарбий ва хориждаги сайловчиларга почта орқали юборилади. Бироқ, Шимолий Каролина каби баъзи штатлар почта жўнатмаларини эртароқ, 6 сентябрда бошлайди.
Сайловчиларни рўйхатга олиш муддатлари штатларга қараб фарқ қилади, лекин аксарияти сайловга 8-30 кун қолганида бошланади.
Деярли барча штатлар шахсан овоз беришни таклиф қилади, аммо қоидалар ва саналар фарқ қилади. Пенсильванияда сайловчилар 16 сентябрдан бошлаб ўзларининг маҳаллий сайлов идораларига сайлов бюллетенини сўрашлари ва топширишлари мумкин.
Келгуси дебатлар
Президентликка ва вице-президентликка номзодлар ўртасидаги дебатлар ўтказиладиган жой ва қоидалари борасида баҳслар давом этмоқда. Ҳозирча иккита учрашув режалаштирилган.
Дональд Трамп ва Камала Харрис ABC News телеканалининг 10 сентябрь куни Филадельфияда бўлиб ўтадиган дебат таклифини қабул қилди. Трамп турли телевизион тармоқларда уч раунд дебат ўтказишни таклиф қилди.
Демократик партиядан вице-президентликка номзод Миннесота губернатори Тим Уолз ва республикачи Огайо штатидан сенатор Жей Ди Вэнс 1 октябрь куни Нью-Йоркда CBS News ўтказадиган дебатга розилик бердилар. Вэнс 18 сентябрь куни яна бир дебат ўтказишни таклиф қилди, аммо бу ҳали тасдиқланмаган.
2 сентябрь куни Тим Уолз кортежи автоҳалокатга учради ва журналистлардан бири қўлидан жароҳат олди. Уолзнинг ўзи жабрланмаган.
Овоз учун кураш
Сайлов қоидалари бўйича кураш қизийди. Трамп сайловда ҳалоллик бўйича гуруҳ тузди, у овоз бериш қоидаларига қарши бир неча судга даъво қилган. Демократлар, шунингдек, сайлов ҳуқуқига эга сайловчиларга таъсир кўрсатиши мумкин бўлган сайловчилар рўйхатини "тозалаш" га қарши туриш учун ўзларининг юридик гуруҳини тайёрламоқда.
