АҚШда Alaska Airlines самолётидан тушиб кетган телефон йўлдан топилди

Вашингтон штатида яшовчи Шон Бейтс йўлда ҳамон батареяси ярим зарядланган ва экрани қулфланмаган самолёт режимида бўлган iPhone телефонини топди. Экранда Alaska Airlines авиакомпаниясининг жума кунги рейсидан багажни талаб қилиш бўйича чек бор эди, дея хабар беради Kazinform агентлиги “Америка Овози”га таяниб.

Телефонни топгач, Бейтс АҚШ Миллий транспорт хавфсизлиги кенгашига мурожаат қилди. У ерда унга ушбу рейсдан тушиб кетган иккинчи телефонни топиб олганини айтишди, деб хабар беради CBS.

Бу маълумотни 7 январь куни бўлиб ўтган матбуот анжумани чоғида Кенгаш вакили тасдиқлади.

Эслатиб ўтамиз, жума куни Портленддан Онтариога учаётган Alaska Airlines авиакомпаниясининг Boeing 737 MAX 9 самолёти билан боғлиқ ҳодиса содир бўлган эди. Парвоз вақтида самолётнинг фавқулодда чиқиш эшиги очилиб қолган. Учувчилар фавқулодда қўнишга мажбур бўлган. 171 йўловчи ва 6 экипаж аъзоси бўлган самолёт эсон-омон қўнди. Ҳодиса оқибатида ҳеч ким жабрланмаган.