АҚШ ва Хитой ўртасидаги савдо можароси Ўзбекистонга салбий таъсир кўрсатиши мумкин

TASHKENT. Kazinform – АҚШ ва Хитой ўртасидаги савдо кескинлиги Ўзбекистон ташқи савдо айланмасига салбий таъсир кўрсатиши мумкин, деб хабар беради Kazinform агентлигининг Ўзбекистондаги мухбири Алихан Асқар.

Бу ҳақда Ўзбекистон Республикаси Марказий банки Валютани тартибга солиш ва тўлов баланси департаменти директори Отабек Тожиддинов ОАВ вакиллари иштирокидаги матбуот анжуманида маълум қилди.

Маърузачи таъкидлаганидек, савдо соҳасидаги можаронинг оқибатлари Ўзбекистонни ҳам четлаб ўтмайди. Зеро, расмий Пекин Тошкентнинг асосий ташқи савдо шериги саналади. Шу билан бирга, Хитой томони импортни қисқартириши ва экспортни ошириши мумкин.

Отабек Тожиддиновнинг таъкидлашича, АҚШ ва Хитой Халқ Республикаси ўртасидаги савдо кескинлиги Дональд Трамп президент этиб сайланганида ҳам кузатилган. 2018 йилда расмий Вашингтон Хитойда ишлаб чиқарилган алюминий ва пўлатга юқори божлар жорий қилди ва шунга кўра Пекин Америка товарларига божлар жорий қилди.

“2019 йилда Ўзбекистоннинг Хитойга экспорти 22 фоизга қисқарди, импорт эса 34 фоизга ошди. Яъни, Хитой АҚШга экспортни камайтирса, бу давлат бошқа бозорларни қидира бошлайди, улардан бири, албатта, Ўзбекистон. Натижада савдо балансидаги дефицит ортиши мумкин”, – деди Отабек Тожиддинов.

Унинг сўзларига кўра, Хитой товарларининг Ўзбекистон ва Марказий Осиё мамлакатларига кенг кўламда экспорт қилиниши транспорт-логистика хизматларига талабни оширмоқда. Бу, ўз навбатида, савдо балансидаги тақчилликнинг бир қисмини ёпишга ёрдам беради.

Марказий банк вакилининг айтишича, АҚШ ва Хитой ўртасидаги савдо можаросининг мумкин бўлган оқибатлари тўлиқ таҳлил қилинмаган. Унинг таъсири камида 3 ойдан кейин кўринади.