АҚШ Конгресси TikTokни тақиқлаш бўйича қонун лойиҳасини маъқуллади
ASTANA. Kazinform – АҚШ Конгрессининг Вакиллар палатаси Хитойнинг TikTok мобиль иловасини бутун мамлакат бўйлаб тақиқловчи қонун лойиҳасини маъқуллади.
352 конгрессмен ҳужжатни қўллаб-қувватлади, 65 нафари қарши чиқди. Қонун лойиҳасига кўра, интернет-платформа эгаси ByteDance олти ой ичида TikTokни сотиши керак. Акс ҳолда, ижтимоий тармоқ барча иловалар дўконларидан ўчирилади.
Қонунчилар TikTok АҚШ миллий хавфсизлигига таҳдид солаётганидан хавотирда. Бунинг сабаби шундаки, илова ўз фойдаланувчиларининг нозик маълумотларини Хитой ҳукумати билан баҳам кўради.
Ўтган йилнинг март ойида АҚШ Конгрессида TikTok ижтимоий тармоғи раҳбари иштирокида йиғилиш бўлиб ўтган ва демократлар ва республикачилар бу ижтимоий тармоқ хавфсизлигига шубҳа билан қарашларини билдиришган эди. Қонунчилар Пекинда жойлашган ByteDance компанияси TikTok ижтимоий тармоғи фойдаланувчиларининг шахсий маълумотларини Хитой расмийларига топширишидан қўрқишларини айтишди. Ва бу Қўшма Штатларнинг миллий хавфсизлигига путур етказиши мумкин.
“TikTok Америка қадриятларига эга Америка компаниясига айланиши керак, платформа эса Хитой Коммунистик партияси билан алоқаларни узиши керак”, – деди конгрессмен Даррен Сото.
TikTok платформасининг бош директори Шоу Цзи Чу АҚШ Конгрессида бўлиб ўтган йиғилишда ўзини оқлади ва “Биз Хитой Коммунистик партияси билан ишламаймиз, улар учун разведка агенти эмасмиз”, – деди.
“Биз биринчи навбатда интернет фойдаланувчилари орасида ўсмирлар хавфсизлигини таъминлаш ҳақида қайғурамиз. Иккинчидан, биз АҚШ фуқароларининг шахсий маълумотларини ташқаридан ўғирланишининг олдини олиш учун диққат билан кузатиб борамиз. Учинчидан, биз ҳукумат TikTokни назорат қилиш ёки унга аралашишга йўл қўймаслигига ваъда берамиз”, – деган эди Шоу Цзи Чу.
Қайд этиш жоизки, бугунги кунда платформадан 170 миллиондан ортиқ америкаликлар фойдаланмоқда.
