АҚШ Давлат котибининг Жанубий ва Марказий Осиё бўйича ёрдамчиси Қозоғистон, Ўзбекистон ва Ҳиндистонга ташриф буюради

АҚШ Давлат котибининг Жанубий ва Марказий Осиё бўйича ёрдамчиси Қозоғистон, Ўзбекистон ва Ҳиндистонга ташриф буюради
Фото: Султан Досалиев

АҚШ Давлат котибининг Жанубий ва Марказий Осиё бўйича ёрдамчиси Дональд Лу 4-11 ноябрь кунлари Қозоғистон, Ўзбекистон ва Ҳиндистонга ташриф буюрадиган делегацияга бошчилик қилади, деб хабар беради Kazinform мухбири АҚШ Давлат департаментига таяниб.

Марказий Осиёга ташрифдан кўзланган мақсад жорий йилнинг сентябрь ойида БМТ Бош Ассамблеяси доирасидаги биринчи “C5+1” президент саммити ва жорий йил октябрь ойида минтақавий алоқа бўйича “C5+1” вазирлар йиғилишининг самарали бўлишини таъминлашдан иборат.

АҚШ Давлат котиби ёрдамчиси Астанага етиб келгач, Қозоғистон Ҳукуматининг юқори мартабали мулозимлари билан учрашади ва АҚШ ва Қозоғистон ўртасидаги кенгайтирилган стратегик шериклик бўйича мулоқотда иштирок этади. Қўшма Штатлар ва Қозоғистон умумий манфаатларга эга бўлган қатор масалалар, жумладан, сиёсат ва хавфсизлик, иқтисодий ҳамкорлик ва инсон ҳуқуқларини ҳимоя қилиш масалаларини муҳокама қилади. Шунингдек, у аёллар ва қизларнинг имкониятлари ва ҳуқуқларини кенгайтириш, оммавий ахборот воситалари эркинлигини таъминлаш мақсадида фуқаролик жамияти вакиллари билан учрашув ўтказади.

Шундан сўнг Дональд Лу АҚШ-Ўзбекистон стратегик ҳамкорлик мулоқотидаги АҚШ делегациясига раҳбарлик қилиш учун Тошкентга боради. Ташриф давомида АҚШ Давлат котиби ёрдамчиси икки томонлама хавфсизлик алоқалари, савдо ва сармояларни диверсификация қилиш масалаларини муҳокама қилади. Инсон ҳуқуқлари масалалари билан шуғулланувчи фуқаролик жамияти вакиллари билан учрашув ҳам режалаштирилган.

Саёҳатни якунлаш учун АҚШ делегацияси минтақавий ва глобал муаммолар бўйича стратегик мослашув, тоза энергия ва хавфсизлик соҳасидаги ҳамкорликни муҳокама қилиш учун Ҳиндистонга ташриф буюради. “2+2” мулоқоти доирасида АҚШ Давлат котиби ёрдамчиси Дональд Лу Давлат котиби Э.Блинкен ва мудофаа вазири Л.Остиннинг мудофаа ва хавфсизлик, янги технологиялар ва тоза энергия соҳасида ҳамкорлик мавзуларини ишлаб чиқиш ташаббуси билан таништиради.

Сўнгги хабарлар
telegram