Air Astana маслаҳатчилар ёллаб, Лондондаги IPOга тайёргарликни бошлади - Bloomberg
Қозоғистоннинг энг йирик Air Astana авиакомпанияси ўз акцияларини маҳаллий платформа ва Лондон фонд биржасида жойлаштиришга тайёрланмоқда, деб хабар беради Bloomberg ўз манбасига таяниб.
Йиллар давомида кечиктирилган кампания 2024 йилнинг биринчи чорагига режалаштирилган, аммо келишувнинг аниқ муддати бозор шароитлари билан белгиланади.
Авиакомпания Citigroup, Jefferies Financial Group ва Wood & Co компанияларини хориждаги листингга ёрдам бериш учун халқаро маслаҳатчи сифатида, ички бозорда ишлаш учун эса Halyk Finance, BCC Invest, Jusan Invest ва SkyBridge Invest компанияларини ёллади.
Дастлабки маълумотларга кўра, компания IPOда тахминан 1 миллиард долларга баҳоланиши мумкин.
Унинг доирасида Британиянинг BAE Systems мудофаа компанияси ва Қозоғистоннинг “Самруқ-Қазна” миллий фаровонлик жамғармаси инвесторларга ўз улушларининг бир қисмини таклиф қилади.
Айни пайтда Air Astana акцияларининг 49 фоизи BAE Systems компаниясига, 51 фоизи эса «Самруқ-Қазна» миллий фаровонлик жамғармасига тегишли.
Акциядорлар умумий улушини тахминан 50% га камайтиришни режалаштирмоқда.
Бундан ташқари, кампания давомида қўшимча акциялар ҳам чиқарилади.
Bloomberg манбасининг айтишича, потенциал харидорлар билан музокаралар олиб борилмоқда.
Air Astana миллий авиаташувчиси мақомини сақлаб қолиш учун битим шундай тузилганки, акциялар назорат пакетига фақат Қозоғистон фуқаролари ва ташкилотлари эга бўлади.
