Афсонавий Citroën 2CV электромобиль сифатида қайта ишлаб чиқарилади
ASTANA. Kazinform — Франциянинг машҳур Citroën 2CV автомобили ишлаб чиқаришдан олиб ташланганидан қарийб 40 йил ўтиб, электр версиясида қайта бозорга қайтмоқда. Янги модель 13-18 октябрь кунлари бўлиб ўтадиган Париж автосалонида тақдим этилади, деб хабар беради Euronews.
Илк бор 1948 йилда ишлаб чиқарилган Citroën 2CV Франция автомобиль саноатининг рамзларидан бирига айланган. Ушбу модель 1990 йилгача ишлаб чиқарилган бўлиб, барча версияларини ҳисобга олганда, 5 миллиондан ортиқ нусхада сотилган.
Янги электромобиль асл моделнинг ўзига хос хусусиятларини сақлаб қолади. Жумладан, V шаклидаги капот, тик жойлашган олд ойна ва думалоқ фаралар янги автомобиль ташқи кўринишида ҳам акс этган.
Ишлаб чиқарувчи автомобильнинг соддалиги ва ҳамёнбоплигига устувор аҳамият бермоқда. Дастлабки маълумотларга кўра, унинг нархи тахминан 15 минг еврони ташкил этади.
Citroën компанияси бош директори Ксавье Шардон янги моделни тақдим этиш чоғида тарихий автомобилнинг ўзига хос хусусиятларига тўхталди.
“2CV техник жиҳозланиши туфайли эмас, балки одамларга тақдим этган имкониятлари туфайли афсонага айланган. Бугун эса ўша руҳ яна қайтаётир”, — деди Ксавье Шардон.
Stellantis концерни автомобиль нархини ҳамёнбоп даражада сақлаб қолиш учун оғирлиги бир тоннадан ошмайдиган кичик электромобиль яратишни режалаштирмоқда.
Автомобиль шаҳар ичидаги кундалик сафарлар учун мўлжалланган кичик аккумулятор билан жиҳозланади.
Ҳозирча янги Citroën 2CV концепт-кар сифатида тақдим этилмоқда. Унинг серияли ишлаб чиқарилиши 2028 йил охирида, илк моделнинг 80 йиллиги муносабати билан бошланиши мумкин.
Шунингдек, автомобилнинг юк ташишга мўлжалланган фургон версиясини ишлаб чиқариш имконияти ҳам кўриб чиқилмоқда.
Францияда электромобилларга бўлган талаб давлат томонидан қўллаб-қувватлаш чоралари туфайли ортиб бормоқда. Сентябрь ойида мамлакатда рўйхатдан ўтказилган янги автомобилларнинг 42 фоизини электр қувватида ҳаракатланувчи транспорт воситалари ташкил этган. Бу - рекорд кўрсаткич ҳисобланади.
Айниқса, кичик электромобиллар ва давлатнинг ижтимоий лизинг дастури орқали харид қилинадиган транспорт воситаларига талаб юқори. Ўтган ойда ушбу тоифада тахминан 9 500 та автомобиль рўйхатдан ўтказилган.
Хитой автомобиль ишлаб чиқарувчилари билан рақобат кучайиб бораётган бир пайтда, Европа компаниялари ҳам нархи ҳамёнбоп электр моделларига устувор аҳамият бера бошлади.
Масалан, Париж автосалонида Dacia компаниясининг янгиланган Spring модели ва Volkswagen концернининг ID. Polo автомобили ҳам намойиш этилади.
