Африка мамлакатларида 13 миллион одам очлик хавфи остида

«Эфиопия, Кения ва Сомалида ёғингарчилик кам учта ёмғирли мавсум бўлган. Бу ҳосил етишмаслигига ва чорва молларининг нобуд бўлишига олиб келди. Кўплаб оилалар сув ва яйлов йўқлиги сабабли уйларини ташлаб, шаҳарга кўчишга мажбур бўлмоқда. Шу билан бирга, жамоалар ўртасидаги низолар кучайган. Африкадаги қурғоқчилик экинларнинг етишмаслиги, чорва молларининг нобуд бўлишига ва очарчиликка олиб келди», - деди Бирлашган Миллатлар Ташкилотининг Жаҳон озиқ-овқат дастурининг Шарқий Африка бўлими директори Майкл Данфорд.
Бундан ташқари, яқин келажакда ўртача даражадан паст ёғингарчилик прогнози аллақачон қийин вазиятни янада кучайтириши мумкин. Қурғоқчилик Эфиопиянинг жанубий ва жануби-шарқида, Кениянинг жануби-шарқий ва шимолида ҳамда Сомалининг жануби-шарқида яйлов ва деҳқончилик жамоаларини вайрон қилди. Бу асосий озиқ-овқат маҳсулотлари нархининг ошишига олиб келди ва қишлоқ хўжалигида ишчи кучига бўлган талабни янада пасайтирди. Буларнинг барчаси озиқ-овқат билан таъминлашни қийинлаштирди. Шошилинч чоралар кўрилмаса, вазият янада оғирлашади.
ЮНИCЕФ маълумотларига кўра, Африка мамлакатларида озиқ-овқатга муҳтож одамлар сони Греция ва Швеция аҳолиси билан деярли тенг.
«Уларнинг кўпчилиги 40 йил ичида содир бўлган энг ёмон иқлимий фавқулодда вазиятлардан бири туфайли хавф остида бўлган болалардир», - деди ЮНИCЕФнинг Шарқий ва Жанубий Африка бўйича минтақавий директори Моҳамед Фолл.
ЮНИCЕФ вакили минтақа бир вақтнинг ўзида CОVID-19, можаро ва иқлим ўзгариши каби учта таҳдидга дош бера олмаслигидан огоҳлантириб, кўплаб болалар уй-жой, озиқ-овқат, таълим ва соғлиқни сақлашдан маҳрум бўлганини таъкидлади. Ҳозирда минтақада 5,5 миллионга яқин бола очликдан ўлиш хавфи остида. Ушбу инқироздан чиқиш учун бутун халқаро ҳамжамиятнинг биргаликдаги саъй-ҳаракатлари талаб этилади.
2022 йилда ЮНИCЕФ Африка мамлакатларидаги операциялар учун донорлардан 123 миллион доллар сўради.
«Миллионлаб одамларнинг ҳаёти ва келажаги бунга боғлиқ. Биз зудлик билан ва ҳар томонлама ҳамкорликда ишлашимиз керак», - деди ЮНИCЕФ вакили.