АЭС қурилишини қўллаб-қувватлаш бўйича Халқ штаби миллионлаб қозоғистонликларни бирлаштирди
ASTANA. Kazinform – ҚР Мажились спикери, “АMANAT” партияси раиси Ерлан Қошанов АЭС қурилишини қўллаб-қувватлаш бўйича Халқ штабининг биринчи йиғилишини ўтказди. Унинг таркибига 6 та сиёсий партия, шунингдек, 20 га яқин республика жамоат бирлашмаларининг 250 га яқин вакили кирди, деб хабар беради Kazinform штаб матбуот хизматига таяниб.
6 октябрь куни бўлиб ўтадиган АЭС қуриш бўйича референдум Мустақил Қозоғистон келажаги учун катта стратегик аҳамиятга эга. Шунинг учун ҳам мамлакатдаги нуфузли сиёсий ва жамоат ташкилотлари АЭС қурилишини қўллаб-қувватлаш мақсадида Халқ штабига қўшилди. Бу ҳақда штабнинг биринчи йиғилишида Мажилис спикери, “АMANAT” партияси раиси Ерлан Қошанов маълум қилди. Штабнинг мақсади - атом электр станциясини қуришнинг илғор ғояси атрофида одамларни тўплаш.
“АЭС қурилиши Қозоғистоннинг узоқ йиллар давомида муваффақиятли ривожланишини кафолатлайдиган динамик лойиҳадир. Мамлакатимиздаги ва дунёнинг барча илғор инсонлари ядро энергиясидан фойдаланиш самарадорлигини яхши тушунади. Бу, биринчи навбатда, хавфсиз, ишончли, экологик тоза лойиҳадир. Биз катта танлов олдида турибмиз. Бинобарин, Халқ штабининг вазифаси бутун республика бўйлаб кенг кўламли тарғибот-ташвиқот ишларини олиб бориш, аҳолини АЭСни қўллаб-қувватлашга сафарбар этишдан иборат. 6 октябрь куни бўлиб ўтадиган референдум бирлигимизни кўрсатади”, - деди у.
Мажлис спикери таъкидладики, бугунги кунда энергетика мустақиллиги масаласи кун тартибида биринчи ўринда туради. Атом энергиясининг самарадорлиги ва хавфсизлигини дунёнинг илғор мамлакатлари тажрибаси яққол исботлаб турибди. Айни пайтда Қозоғистон электр энергияси танқислигини бошдан кечирмоқда ва уни қўшни давлатлардан импорт қилишга мажбур. Бинобарин, АЭС қурилишининг аҳамияти ва афзалликларини жамоатчиликка етказиш, одамлардаги асоссиз ваҳималарни тарқатиш Халқ штабининг асосий вазифаси ҳисобланади. Бундан ташқари, партиялар ва нодавлат нотижорат ташкилотлари ҳамкорликда муваффақиятли иш тажрибасига эга.
“Ҳар биримиз фарзандларимиз қудратли, ҳеч кимга муҳтож бўлмаган мустақил давлатда яшашини хоҳлаймиз. АЭС қуриш қарорини қабул қилиб, биз бу юксак орзу сари қадам ташламоқдамиз. Биз мамлакатнинг энергетик мустақиллигини мустаҳкам ўрнатамиз. Биз келажак авлодларга энергиядан мустақил, яъни барқарор ва обод Қозоғистонни қолдирамиз. Бу тарихий қарор адолатли Қозоғистонни яратиш йилномасида янги саҳифа бўлади”, - деди у.
Учрашувда АЭС қурилишини қўллаб-қувватлаган ва Халқ штабига кирганлар орасида Миллий фанлар академияси президенти Ақилбек Куришбаев, “Қозоғистон атом электр станциялари” МЧЖ бош директори Тимур Жантикин, Қозоғистон фуқаролар альянси президенти Бану Нурғазиева, “Атамекен” Миллий тадбиркорлар палатаси президиуми раиси Райимбек Баталов, Қозоғистон Халқ партияси раиси Ермухамет Ертисбаев, “Фахрийлар ташкилоти” РЖБ раиси Бақтиқожа Измухамбетов, “Ауыл” партияси раиси Серик Егизбаев, Қозоғистоннинг “Ақ жол” демократик партияси раиси Азат Перуашев, Мажилис депутати Ермурат Бапи, «Respublica» партияси раиси Айдарбек Қожаназаров, “Байтақ” партияси раиси Азаматхан Амиртаев, “Жастар рухы” ёшлар қаноти раиси Ақерке Искандерова ва бошқалар иштирок этди.
Бундан ташқари, Халқ штабига Қозоғистон Республикаси Касаба уюшмалари федерацияси, “Фахрийлар ташкилоти” РЖБ, Миллий спорт турлари уюшмаси, “ Ассамблея ёшлари” РЖБ, Қозоғистон ядро жамияти, кон-металлургия корхоналари уюшмаси, Қозоғистон электр энергетика ассоциацияси ва бошқа ташкилотлар киритилди.
Штаб таркибига сиёсий партияларнинг марказий ва ҳудудий фаоллари, шунингдек, республика жамоат бирлашмалари вакиллари, жумладан, Мажилис ва маслиҳат депутатлари, зиёлилар, таниқли олимлар, маданият ва спорт арбоблари, “Жастар рухы” ва бошқа ёшлар ташкилотлари фаоллари киритилди. Келгусида штаб аъзолари ҳудудлардаги сайловчилар билан ишлашни йўлга қўяди, меҳнат жамоалари билан учрашувлар ўтказади, чекка аҳоли пунктларида бўлади.
