АЭС бўйича ижобий қарор қабул қилинса, уни ким қуради – ҚР Президенти жавоби

ASTANA. Kazinform – АЭС бўйича ижобий қарор қабул қилинса, уни халқаро консорциум қуриши керак. Бу ҳақда АЭС бўйича референдумда овоз беришдан сўнг ОАВ вакилларига қисқа интервью берган ҚР Президенти Қасим-Жомарт Тоқаев маълум қилди.

“Агар референдум натижаларида Қозоғистон фуқаролари АЭС қурилиши билан боғлиқ масалани қўллаб-қувватлашини билдирса, у ҳолда уни ким қуради?”, – деб сўради ОАВ вакиллари Президентдан.

Давлат раҳбари бу муаммо мураккаб эканини таъкидлади.

“Ҳукумат экспертиза билан шуғулланиши ва шунга мувофиқ музокаралар олиб бориши керак. Бироқ, бу масала бўйича менинг шахсий фикрим шуки, Қозоғистонда энг илғор технологияларга эга глобал компаниялардан иборат халқаро консорциум ишлаши керак. Аммо бундан буён ҳаёт кўрсатади”, – деди Қасим-Жомарт Тоқаев.

Эслатиб ўтамиз, аввалроқ Қасим-Жомарт Тоқаев АЭС бўйича референдумда овоз бергани ҳақида ёзган эдик.

Референдум ўтказувчи Марказий комиссия раиси ўринбосари Константин Петров Қозоғистонда атом электр станциясини қуриш бўйича мамлакатнинг барча ҳудудларида умумхалқ референдуми бошланганини расман маълум қилди.

1 июль ҳолатига кўра, бутун мамлакат бўйлаб 12 миллион 176 минг 968 киши референдумда қатнашиш ҳуқуқига эга.