48 ёшли ўзбекистонлик гимнастикачи тўққизинчи бор Олимпиада йўлланмаси учун курашади

ТASHKENT. Кazinform - Ўзбекистонлик гимнастикачи Оксана Чусовитина тўққизинчи бор Олимпиада ўйинларида иштирок этиш мақсадида йўлланма учун курашади. Бу ҳақда Kazinformнинг Ўзбекистондаги мухбири Алихон Асқар хабар беради.

Ўзбекистон Миллий Олимпия қўмитаси (МОҚ) хабарига кўра, Оксана Чусовитина гимнастика бўйича миллий терма жамоа таркибида 15-18 февраль кунлари Қоҳирада бўлиб ўтадиган Жаҳон кубогининг биринчи босқичига йўл олди.

“Шундай қилиб, О.Чусовитина спорт карьерасидаги тўққизинчи Олимпиада ўйинларида иштирок этиш имконини берувчи йўлланма учун кураш олиб боради”, — дейилади МОҚ хабарида.

Қўмита маълумотларига кўра, жаҳон чемпионатининг барча тўрт босқичида 2 нафар энг яхши гимнастикачи Париж Олимпиадасига йўлланмани қўлга киритади.

Эслатиб ўтамиз, шу йилнинг июнь ойида 49 ёшга тўладиган Оксана Чусовитина 8 марта Олимпиада ўйинларида иштирок этиб, Гиннеснинг рекордлар китобига кирган эди. У 1992 йилда Барселонада бўлиб ўтган Олимпиадада жамоавий кўпкурашда олтин медални, 2008 йилда Пекинда кумуш медални қўлга киритди. Шунингдек, ушбу спортчи жаҳон чемпионатининг уч карра ғолиби бўлган.

Токио Олимпиадасидан сўнг Оксана Чусовитина спортдаги фаолиятини якунлашини маълум қилди. Бироқ, кейинчалик у спортга қайтди. Агар Франциядаги тўрт йилликнинг асосий мусобақасига йўлланмани қўлга киритса, Чусовитина ўз рекордини янгилайди.