26 декабрь куни Озарбайжонда мотам эълон қилинди
ASTANA. Kazinform – 25 декабрь куни Бокудан Грознийга учаётган Embraer 190 йўловчи самолёти ҳалокатга учрагани муносабати билан мотам эълон қилинди, деб хабар беради Kazinform АЗЕРТАДЖга таяниб.
Бу ҳақдаги тегишли фармойишни Озарбайжон Республикаси Президенти Илҳом Алиев имзолади.
Шунингдек, Боку-Грозний йўналишида J2-8243 рейсини амалга ошираётган Озарбайжон ҳаво йўллари компаниясига қарашли Embraer 190 самолётининг Ақтау шаҳри яқинида ҳалокатга учраши сабабларини ўрганиш бўйича давлат комиссияси тузиш ва тегишли чоралар кўриш тўғрисидаги фармойиш ҳам имзоланди.
Эслатиб ўтамиз, 25 декабрь, чоршанба куни Бокудан Грознийга учаётган Озарбайжон ҳаво йўллари самолёти Ақтау яқинида ҳалокатга учради. Самолёт бортида 69 киши бўлган, улардан 28 нафари касалхонага ётқизилган.
Фавқулодда вазиятлар вазирлигининг янгиланган маълумотларига кўра, бортда 69 киши, жумладан 5 нафар экипаж аъзоси бўлган.
Президент Қасим-Жомарт Тоқаев топшириғига биноан Астанадан Ақтауга тез тиббий ёрдам самолёти учиб кетди.
