2040 йилда Туркистон шаҳри аҳолиси 400 мингга етади
TÚRKІSTAN. KAZINFORM – Куни кеча Туркистон шаҳри Бош режасига ўзгартириш ва қўшимчалар киритиш масаласи муҳокама этилди.
Йиғилишда Бош режа лойиҳаси тақдим этилди. У ерда шаҳарни 2040 йилгача ривожлантириш режаси белгиланган. Шаҳар инфратузилмасини яхшилаш, туризмни ривожлантириш, тарихий жойлар ва обидаларни асраб-авайлашга устувор аҳамият қаратиляпти. Шу билан бирга, шаҳарнинг ҳар бир тармоғини ривожлантириш, ижтимоий соҳа объектлари билан таъминлаш, аҳоли сонига мос равишда иссиқлик ва сув тизимлари қувватини ошириш, шаҳар ичидаги йўлларни оптималлаштириш ва бошқа масалалар ўрин олган. 2040 йилда Туркистон шаҳри аҳолисининг сони 400 минг кишига етиши тахмин қилиниб, шаҳарнинг Бош режаси шунга мос равишда тўлдирилди.
Вилоят раҳбари Бош режани ўрганиш ва тўлдириш бўйича топшириқ берди. Соҳа раҳбарлари билан маслаҳатлашиб, атрофлича муҳокама қилиш зарурлигини, таклифларни такомиллаштириш муҳимлигини айтди.
«Давлат раҳбари ташаббуси билан Туркистон шаҳрига алоҳида мақом бериш тўғрисида қонун лойиҳаси ишлаб чиқилди. Буни ҳисобга олиш керак. Иккинчидан, шуни ёдда тутиш керакки, Туркистон нафақат минтақанинг, балки туркий дунёнинг ҳам марказидир. Шаҳарнинг бош режаси ва лойиҳа кодекси замонавий талабларга жавоб бериши ва уни йирик агломерация даражасига кўтариш учун сифатли бўлиши керак. Қайта ўрганиб, аниқ таклифлар киритиш керак», – деди Нуралхан Кошеров.
Архитектура лойиҳалари муҳокама этилган йиғилишда вилоятдаги туман ва шаҳар марказларининг лойиҳа кодексини ишлаб чиқиш, аҳоли пунктлари архитектурасини такомиллаштириш, «Біркөлік» рекреацион зонасини тартибга солиш масалалари ҳам муҳокама этилди. Туркистон вилояти архитектура ва шаҳарсозлик бошқармаси бошлиғи Нурлижан Букебоевнинг ҳисоботи тингланди. Соҳага масъул раҳбарларга тегишли топшириқлар берилди. Таклифлар ўрганилиб, қайта кўриб чиқилди.
Эслатиб ўтамиз, аввалроқ Туркистонда бир қатор объектлар қурилиши амалга оширилиши ҳақида ёзган эдик.
Муаллиф: Қайрат Зайнишев
