2029 йилгача инвестиция сиёсати концепцияси янгиланди: камида 150 миллиард доллар жалб этиш

ASTANA. Kazinform – ҚР Бош вазири ўринбосари – Миллий иқтисодиёт вазири Нурлан Байбазаров Ҳукумат йиғилиши якунлари бўйича ўтказилган брифингда Президентнинг “Адолатли Қозоғистон: қонун ва тартиб, иқтисодий ўсиш, жамоатчилик оптимизми” Мурожаатномасида белгилаб берилган вазифаларни амалга оширишнинг бориши, янги инвестицион циклни ишга тушириш тўғрисида ахборот берди. Бу ҳақда Kazinform агентлиги Қозоғистон Ҳукуматининг Тelegram-каналига таяниб хабар беради.

Шу мақсадда 2029 йилгача бўлган инвестиция сиёсати концепцияси янгиланди. Унинг асосий мақсади камида 150 миллиард доллар тўғридан-тўғри хорижий инвестицияларни жалб қилиш ва асосий капиталга оқимини ЯИМнинг 23 фоизигача оширишдан иборат. Жорий йилда 70 та янги лойиҳа ишга туширилади, шундан 34 тасида ишлаб чиқариш йўлга қўйилган.

Қатар билан ҳукуматлараро битимни ратификация қилиш доирасида саноат ва инфратузилма лойиҳаларига қарийб 20 миллиард доллар сармоя жалб этувчи 9 та лойиҳани амалга ошириш режалаштирилган.

- Ислом банки гуруҳининг молия институтлари ва Форс кўрфазининг инвестиция фондлари жорий йилда Қозоғистонга инвестор сифатида фаол қизиқиш билдирмоқда. Яқин орада Ислом тараққиёт банки билан сув лойиҳаларини молиялаштириш ва амалга ошириш бўйича умумий қиймати 1 миллиард доллардан ортиқ бўлган шартнома имзоланиши кутилмоқда. Шунингдек, Қозоғистонда сув ресурсларини бошқариш, транспорт инфратузилмасини қуриш ва реконструкция қилиш, соғлиқни сақлаш, нефть-газ сектори, таълим каби соҳаларда умумий қиймати 7 миллиард доллардан ортиқ бўлган 30 га яқин лойиҳани молиялаштириш бўйича дастлабки ният мавжуд, - деди Н.Байбазаров.