2024 йилнинг биринчи ярмида мамлакат иқтисодиётига 9,8 миллиард доллар сармоя киритилди
ASTANA. Kazinform – 2024 йилнинг биринчи ярми якунларига кўра, хориждан киритилган тўғридан-тўғри инвестицияларнинг умумий ҳажми 9,8 миллиард долларни ташкил этди. Бу ҳақда ҚР Президентининг маслаҳатчиси – Матбуот котиби Берик Уали Egemen Qazaqstan газетасида ёзди.
“Йил бошида, яъни 7 февраль куни бўлиб ўтган Ҳукуматнинг кенгайтирилган йиғилишида Президент рақобатни ривожлантириш, давлатнинг иқтисодиётга аралашувини камайтириш, бизнес харажатларини камайтириш орқали тадбиркорлик эркинлигини таъминлаш бўйича топшириқ берган эди. 10 май куни Қасим-Жомарт Тоқаев “Иқтисодиётни либераллаштириш чора-тадбирлари тўғрисида”ги Фармонни имзолади. 2 сентябрда эса Қозоғистон халқига “Адолатли Қозоғистон: қонун ва тартиб, иқтисодий ўсиш, жамоатчилик оптимизми” деб номланган мурожаатида Президент яқин келажакда мамлакат иқтисодиётини ривожлантиришнинг асосий йўналишларини белгилаб берди. Ҳукумат йил давомида ана шу асосий вазифаларни бажариш учун бор кучини сарфлади”, - деб ёзади Берик Уали.
Жорий йилда мамлакатимиз иқтисодиётига қанча сармоя жалб этилаётгани ҳам айтиб ўтилди.
“2024 йилнинг биринчи ярми якунларига кўра, хориждан киритилган тўғридан-тўғри инвестицияларнинг умумий ҳажми 9,8 миллиард долларни ташкил этди. Бу кўрсаткич тоғ-кон саноати, улгуржи ва чакана савдо, қайта ишлаш саноатида кўпроқ қайд этилди. Асосий капиталга киритилган инвестициялар ҳажми январь-ноябрь ойларида 15,8 триллион тенгега етди. Бугунги кунда умумий қиймати 795,9 миллиард тенге бўлган 134 та лойиҳа ишга туширилди, 10,1 минг доимий иш ўрни яратилди. Давлатимиз раҳбари иш бошлаган бир қанча йирик завод ва корхоналарга махсус ташриф буюриб, улар фаолияти билан танишди”, - дейилади мақолада.
