2022 йилги Қишки Олимпиада ўйинлари машъаласи Пекинга етказилди
Олимпиада ташкилий қўмитаси делегацияси бўлган самолёт чоршанба куни эрталаб Хитой пойтахтидаги «Шоуду» халқаро аэропортига қўнди. Кейин «Қушлар уяси» Миллий стадиони яқинида жойлашган Олимпия минорасида кутиб олиш маросими бўлиб ўтди.
Олимпия машъаласи аввал Пекиндаги Олимпия минорасига қўйилади, сўнгра Хитой бўйлаб турнеда олиб юрилади. Aммо коронавирус туфайли машъала эстафетасининг масофаси қисқарган.
2022 йил 2 февралдан 4 февралгача Қишки Олимпия ўйинларининг учта мусобақа ҳудудида - Пекин, Яньцин ва Чжанцзякоуда 1200 нафар машъала кўтарувчилар иштирокидаги эстафетанинг якуний босқичи ўтказилади.
Эслатиб ўтамиз, ХХIV Қишки Олимпия ўйинлари Пекинда 2022 йил 4-20 феврал, Паралимпия ўйинлари эса 4-13 март кунлари бўлиб ўтади.
Муаллиф: Руслан Сулейменов