20 ёшли Кими Антонелли «Формула-1» тарихидаги энг ёш жаҳон чемпионига айланди
ASTANA. Kazinform - Mercedes жамоасининг италиялик пойгачиси Кими Антонелли Мексика Гран-при натижаларига кўра, муддатидан аввал «Формула-1» бўйича жаҳон чемпиони унвонини қўлга киритди. Шу тариқа, у чемпионат тарихидаги энг ёш жаҳон чемпионига айланди, деб хабар беради Kazinform агентлиги DWга таяниб.
Пойга 1 ноябрда Мехико шаҳрида бўлиб ўтди. Антонелли маррага учинчи бўлиб етиб келди. Бироқ у тўплаган очколар шахсий ҳисобда жаҳон чемпионати ғолиблигини муддатидан аввал таъминлаш учун етарли бўлди.
Мексика Гран-при мусобақасида Red Bull жамоаси вакили, тўрт карра жаҳон чемпиони Макс Ферстаппен ғалаба қозонди. Иккинчи ўринни Ferrari жамоасининг етти карра чемпиони Льюис Хэмилтон эгаллади.
Мексика босқичидан кейин умумий ҳисобда Антонеллининг энг яқин таъқибчиларидан устунлиги 119 очкога етди. Бу эса уни қолган рақиблари учун етиб олиб бўлмайдиган даражага олиб чиқди.
Чемпионлик унвонини қўлга киритган куни италиялик пойгачи 20 ёшда эди. У 2010 йилда 23 ёшу 134 кунлигида жаҳон чемпиони бўлган германиялик Себастьян Феттелнинг рекордини янгилади.
Антонелли, шунингдек, «Формула-1» тарихида чемпионлик унвонини қўлга киритган учинчи италиялик пойгачи бўлди. Бунгача ушбу натижага 1950 йилда Жузеппе Фарина, 1952 ва 1953 йилларда эса Альберто Аскари эришган эди. Шу тариқа, Италия 73 йилдан кейин илк бор жаҳон чемпионига эга бўлди.
Кими Антонелли «Формула-1»даги фаолиятини 2024 йилда Mercedes жамоасининг синов пойгачиси сифатида бошлаган. Кейинги мавсумда у уч марта шоҳсупага кўтарилиб, 150 очко билан чемпионатни еттинчи ўринда якунлаган.
2026 йилги мавсумда эса италиялик пойгачи Гран-при босқичларида тўққиз марта ғалаба қозониб, илк чемпионлик унвонини муддатидан аввал қўлга киритди.
