11 декабрь куни Қурултойда иқтисодиётни рақамлаштириш бўйича эшитув бўлиб ўтади
ASTANА. Кazinform — Қурултойда “Рақамлаштириш ва сунъий интеллект йили доирасида иқтисодиётнинг реал секторини рақамли трансформация қилиш” мавзусида эшитув ўтказиш учун махсус комиссия тузилди.
— Қурултойнинг асосий ҳаракатлар режасига мувофиқ, жорий йилнинг 11 декабрь куни Рақамлаштириш, инновациялар ва фан қўмитаси “Рақамлаштириш ва сунъий интеллект йили доирасида иқтисодиётнинг реал секторини рақамли трансформация қилиш” мавзусида эшитув ўтказишни режалаштирмоқда. Тадбир давомида саноат, қурилиш, транспорт, энергетика ва қишлоқ хўжалиги соҳаларида иқтисодиётни рақамлаштиришнинг ҳозирги ҳолати, долзарб муаммолар ва уларни ҳал қилиш йўллари муҳокама қилинади, — деди депутат Дархан Ахмедиев Қурултойнинг ялпи мажлисида.
Эшитувда Бош вазир ўринбосари — Сунъий интеллект ва рақамли ривожланиш вазири Жаслан Мадиев, бир қатор марказий давлат органлари раҳбарлари, соҳа уюшмалари ва бизнес вакиллари, шунингдек, мустақил экспертлар иштирок этади.
Қурултой регламентининг 211-моддасига мувофиқ, эшитув ўтказиш учун махсус комиссия тузилди.
Унинг таркибига барча доимий қўмиталар ва сиёсий партиялар фракцияларидан 19 нафар депутат киради. Қурултойнинг Рақамлаштириш, инновациялар ва фан қўмитаси раиси Дархан Ахмедиев комиссия раиси этиб сайланди.
Эслатиб ўтамиз, Қозоғистон Қурултойи Президент Мурожаатномаси юзасидан баёнот эълон қилди.
