1 миллионга яқин қозоғистонлик қизамиққа қарши қўшимча эмланди
Қозоғистон Республикаси Соғлиқни сақлаш вазири Ажар Ғиният қозоғистонликларнинг қизамиққа қарши эмланиши тўғрисидаги маълумотларни очиқлади, дея хабар беради Каzinform.
– Қизамиқ билан боғлиқ вазиятни барқарорлаштириш мақсадида ўтган йили ушбу касалликка қарши режали эмлаш ўтказилиб, бир ёшдан олти ёшгача бўлган 700 мингга яқин бола эмланди. Эмланмаган болалар ўртасида қизамиқ билан касалланиш қайд этилганлигини ҳисобга олиб, 2023 йил сентябрь ойида Ҳукумат захирасидан маблағ ажратилиб, қизамиқ, қизилча ва паротитга қарши 1,5 миллион доза вакцина харид қилинди. Ноябрь ойидан бошлаб ушбу инфекцияларга қарши қўшимча эмлаш амалга оширилди, - деди Ажар Ғиният Ҳукумат йиғилишида.
Унинг сўзларига кўра, бугунги кунга қадар қўшимча эмлаш доирасида 930 мингдан ортиқ киши эмланган бўлса, яъни, 62 фоиз қамраб олинган, ҳар куни 20 мингдан ортиқ киши эмланади.
– Айни пайтда мамлакатимизнинг аксарият ҳудудларида қўшимча эмлаш бўйича ижобий тенденция кузатилмоқда. Шундай қилиб, Жетису, Қизилўрда, Туркистон вилоятлари ва Чимкент шаҳрида аҳолининг 70 фоиздан ортиғи қўшимча эмлаш билан қамраб олинди. Коронавирус инфекцияси бўйича эпидемиологик вазиятга келсак, у барқарорлигича қолмоқда. Ўтган 6 ойда республикада ҳар ойда 100 тадан 400 тагача касалланиш қайд этилгани аҳоли ўртасида йил давомида коронавирус тарқалишини тасдиқлайди. Ўтган йили республикада COVID-19 билан касалланганлар сони 12 121 тага етди. 2023 йилнинг январь-декабрь ойларида касалланиш 19 мартага камайди, - дея қўшимча қилди вазир.
