Қозоғистон ва Америка экспертлари Марказий Осиё муаммоларини ўргандилар
Бугун Астанадаги Назарбоев университетида Қозоғистон ва америкалик 16 нафар етакчи эксперт Oxus Societyнинг Марказий Осиё муаммоларига бағишланган «Kazakhstan Future» дастури доирасида ўз тадқиқот натижаларини тақдим этди, деб хабар беради Kazinform.
Тадбирни Назарбоев университети ректори доктор Илесанми Адесида очиб берди ва Kazakhstan Futures дастурининг муҳимлигини таъкидлади.
“Университетимиз кўплаб йўналишларда иш олиб бормоқда, жумладан, Қозоғистон учун мамлакат келажагини белгиловчи етакчиларни яратиш. Ўйлайманки, бу ерда мутахассислар тўлдириши мумкин бўлган баъзи камчиликлар мавжуд. Булар халқаро нуқтаи назардан Марказий Осиё давлатлари ва Қозоғистон билан боғлиқ тадқиқотлардир. Марказий Осиё давлатлари жаҳон муҳокамаларида етакчи бўлиши учун бизга натижалар керак. Бу бизнинг вазифамиз”, - деди университет ректори.
Ташкилотчиларнинг сўзларига кўра, йил бошидан бери Қозоғистон ва америкалик тадқиқотчилар декарбонизациянинг моношаҳарларга таъсири, Марказий Осиёда минтақавийлик ривожланиши, Қозоғистондаги ўзгаришларнинг долзарблигини тушуниш учун аҳолини рўйхатга олишнинг аҳамияти, халқаро ҳамкорлик ва Қозоғистондаги яшил энергия ва тенгсизлик масалаларини ўрганишган.
“Жорий йилнинг февраль ойида Вашингтонда жойлашган Oxus Society жамияти Марказий Осиё мамлакатлари муаммоларини ўрганувчи экспертларни бир жойга тўплаб, «Kazakhstan Future» дастурини ишлаб чиқди. Мақсад – АҚШ ва Қозоғистон ўртасидаги муносабатларни яхшилаш. Ҳар икки давлат мутахассислари томонидан маълум бир масала юзасидан тадқиқотлар олиб борилиб, натижалар асосида тавсиялар ишлаб чиқилади. Шундай қилиб, сиёсат ўзгаришига ҳисса қўшади. Менинг мавзуим халқаро муносабатлар, жумладан, Марказий Осиё давлатларининг ўзаро ҳамкорлиги масаласидир. Бизнинг тадқиқот гуруҳимизда 3 киши, жумладан 2 қозоғистонлик ва 1 америкалик тадқиқотчи бор. Бугунги тадбирда 8 ойлик иш натижаларини тақдим этмоқдамиз”, - деди Назарбоев университети Давлат сиёсати олий мактаби доценти Жанибек Аринов.
Унга кўра, тадқиқот натижалари Oxus Society жамияти сайтида эълон қилинади ва бу борадаги ишлар давом эттирилади.
