Жиноий гуруҳларни аниқлаш мақсадида ўтказилган кенг кўламли рейдлар давомида Тошкент ва Фарғона шаҳарларида 80 дан ортиқ шахс жиноий фаолиятда гумонланиб қўлга олинди.
Фарғона вилоятида содир этилган 96 жиноят фош этилиб, жиноят содир этгани учун қидирувда бўлган 50 нафар шахс ушланган. Яна 25 нафардан ортиқ шахс гуруҳларга алоқадорлик ва безорилик айби билан қўлга олиниб, уларнинг фаолиятига чек қўйилди.
Улардан 5,9 килограмм гиёҳвандлик воситалари, 414 дона психотроп ва кучли таъсир этувчи моддалар, 42 дона қурол, 221 дона ўқ-дорилар, 61 дона компьютер ва тақиқланган диний адабиётлар бўлган телефонлар ашёвий далил сифатида олиб қўйилди. Шунингдек, Тошлоқ туманида яшовчи фуқаро ўз уйида 8 дона ов милтиғи, 61 дона патрон, 400 грамм порох ва 140 дона 5,6 миллиметрли ўқ-дориларни қонунга хилоф равишда сақлаганлиги аниқланган.
Аввалроқ Ўзбекистоннинг турли вилоятларида уюшган жиноий гуруҳнинг 100 дан ортиқ аъзоси қўлга олинган эди.