Йиғилиш давомида иштирокчилар ШҲТ доирасида савдо-иқтисодий ва маданий-гуманитар ҳамкорликни ривожлантиришга оид кенг кўламли масалаларни муҳокама қилдилар. 2026-2027 йилларда ШҲТ доирасида олий ва юқори даражаларда ўтказиладиган тадбирлар жадвали юзасидан атрофлича фикр алмашилди.
Жумладан, ШҲТга аъзо давлатлар ҳукумат раҳбарлари (бош вазирлар) кенгашининг (ҲРК) навбатдаги йиғилишига тайёргарлик масалалари кўриб чиқилди. Мазкур йиғилиш 19-20 октябрь кунлари Душанбе шаҳрида бўлиб ўтиши режалаштирилган. Транспорт-транзит соҳасидаги ўзаро ҳамкорлик, молиявий ҳамкорликни мустаҳкамлаш, шунингдек, ташкилот фаолиятини такомиллаштириш масалалари бўйича якуний ҳужжатлар лойиҳаларига алоҳида эътибор қаратилди.
Йиғилиш якунида миллий мувофиқлаштирувчилар Шанхай ҳамкорлик ташкилотининг аъзо давлатлар ўртасидаги кўп қиррали ҳамкорликни янада мустаҳкамлашга қаратилган механизмлари самарадорлигини ошириш бўйича аниқ чора-тадбирларни амалга оширишни давом эттиришга келишиб олдилар.
ШҲТга аъзо давлатлар Миллий мувофиқлаштирувчилари кенгаши ташкилотнинг жорий фаолиятини мувофиқлаштиради, шунингдек, ШҲТга аъзо давлатларнинг тегишли вазирликлари ва идоралари ўртасидаги ҳамкорликни таъминлайди.
Эслатиб ўатмиз, аввалроқ Қозоғистоннинг ШҲТ мамлакатлари билан товар айирбошлаш ҳажми 72,6 миллиард долларга етгани ҳақида хабар берилган эди.