Янги қоидалар 2027 йил 1 январдан кучга киради. Асосий ўзгариш шундаки, спортчиларга нафақат мусобақадаги ўрни учун, балки ҳар бир ғалаба қозонган жанг учун ҳам рейтинг баллари берилади. Шу билан бирга, Ranking Series тоифасидаги турнирларнинг аҳамияти ошади.
Жаҳон чемпионати ва Олимпия ўйинлари ғолиби 40 минг балл олади. Бундан ташқари, ҳар бир ғалаба қозонган жанг учун 2 минг балл қўшилади. Бирорта ҳам жангда ғалаба қозонмаган иштирокчи 250 балл олади.
Ranking Series турнирларида биринчи ўринни эгаллаган курашчи 20 минг балл ва ҳар бир ғалаба учун 1000 балл олади. Қитъа чемпионатлари ва ўйинларида ғолиб, агар унинг ҳисобида 10 000 очко бўлса, ҳар бир ғалаба учун 500 очко олади.
Агар вазн тоифасида саккизтадан кам спортчи бўлса, совринли ўрин учун бериладиган мунтазам очколар сони икки баравар камаяди. Дисквалификация қилинган, ихтиёрий равишда мусобақадан чиқиб кетган ёки саралаш босқичидан ўтмаган курашчиларга рейтинг очколари берилмайди.
Олимпия рейтингини шакллантиришда UWW спортчиларнинг 7 та мусобақадаги энг яхши бешта натижасини ҳисобга олади.
2027 йилда ушбу рўйхатга Ranking Series тоифасидаги учта турнир, қитъа чемпионати ва жаҳон чемпионати киради. 2028 йилда эса курашчилар битта Ranking Series турнири ва қитъа чемпионатида очко тўплашлари мумкин бўлади.
Рейтинг саралаши натижаларига кўра, Олимпиаданинг ҳар бир вазн тоифасида энг яхши учта спортчи 2028 йилги ўйинларга йўлланма олади. Шундай қилиб, ҳар бир ғалаба қозонган жанг Олимпия лицензиясини аниқлашда муҳим рол ўйнайди.
Эслатиб ўтамиз, Халқаро Олимпия қўмитаси Ижроия кенгаши Лос-Анжелесда (АҚШ) бўлиб ўтадиган 2028 йилги Олимпия ўйинлари учун саралаш тизимларининг биринчи тўпламини тасдиқлади.