ҚР Меҳнат ва аҳолини ижтимоий ҳимоя қилиш вазирлиги ногиронлиги бўлган шахслар учун тўсиқсиз муҳит яратиш бўйича ишларни давом эттирмоқда. Ушбу йўналишлардан бири — инватакси хизматини ривожлантириш.
Мазкур хизмат ногиронлиги бўлган шахсларга шаҳар бўйлаб эркин ва қулай ҳаракатланиш имконини беради. Махсус транспорт орқали ишга, ўқишга, тиббий ва реабилитация марказларига бориш мумкин. Шу тариқа фуқароларнинг кундалик ҳаётда фаол иштирок этиши учун шароит яратилмоқда.
“Ҳозир инватакси хизматидан фойдаланиш ҳам осонлашди. Транспорт буюртма қилишда узоқ кутиш ёки ортиқча ҳужжатларни расмийлаштиришга ҳожат йўқ. Хизмат кўрсатиш тизимига замонавий рақамли ечимлар жорий этилди ва машҳур такси сервислари билан интеграция йўлга қўйилди. Жорий йил 1 январдан 31 июлга қадар Астана ва Алматида инватакси 251 мингдан ортиқ сафарга хизмат кўрсатди”, — дейилади вазирлик тарқатган маълумотда.
Астанада ушбу хизматдан ҳар куни фойдаланувчилар кўп. Улар инватакси орқали ишга, таълим олишга, тиббий ва реабилитация марказларига бориб келмоқда.
Етти ой давомида пойтахтда 934 киши инватакси хизматидан фойдаланиб, жами 211 916 та сафарни амалга оширган. 2026 йил июль ойининг ўзида эса алоҳида эҳтиёжларга эга бўлган 735 нафар пойтахт аҳолиси инватакси хизматидан 25 282 марта фойдаланган.
Алматида ҳам хизматдан фойдаланувчилар сони юқори. Йил бошидан бери 1 512 киши 39 802 та сафарни амалга оширган. Июль ойида эса 838 нафар олмаоталик инватакси хизматидан 5 166 марта фойдаланган.
Инватакси хизматининг ривожланиши ногиронлиги бўлган шахсларга керакли жойга ўз вақтида етиб бориш, кундалик ишларини мустақил равишда бажариш ва жамият ҳаётида фаол иштирок этиш имконини беряпти.
Меҳнат вазирлиги келгусида ҳам ижтимоий қўллаб-қувватлаш чораларини рақамлаштириш ва ногиронлиги бўлган шахслар учун зарур хизматларни янада қулай ва очиқ қилиш йўлидаги ишларни давом эттиради.