Таклифга кўра, FIFАнинг 211 та миллий федерациясининг ҳар бирига 4 йил ичида ажратиладиган маблағ миқдори дастлабки 10 миллион доллардан 25 миллион долларгача ошади.
FIFА президенти Жанни Инфантино олти қитъа футбол конфедерациялари раҳбарларига хат йўллади. Ташкилот кенгаши декабрь ойида дастурнинг якуний версиясини ишлаб чиқишни режалаштирмоқда. У март ойида FIFА конгрессида тасдиқланиши мумкин.
Федерация жаҳон чемпионатидан тушган даромаднинг бир қисмини миллий федерациялар ва қитъа конфедерацияларида футболни ривожлантиришга йўналтиради. Маблағларнинг 3,5 миллиард доллардан ортиғи FIFА захираларидан келиб тушиши кутилмоқда. Ушбу маблағ 48 та миллий терма жамоа иштирок этадиган 2026 йилги жаҳон чемпионатидан кутилаётган молиявий даромад туфайли оширилди.
FIFАнинг ҳисоб-китобларига кўра, 2022–2026 йиллардаги тўрт йиллик давр учун умумий даромад тахминан 15 миллиард долларга етади. Бу даврга АҚШ, Канада ва Мексикадаги жаҳон чемпионати ҳам киради. Даромад ташкилотнинг аввалги ҳисоб-китобларидан анча юқори.
Таклиф ҳали расман тасдиқланмаган. Молиялаштиришнинг аниқ миқдори ва уни тақсимлаш тартиби ташкилот раҳбарияти томонидан ҳал қилинади.
Эслатиб ўтамиз, FIFA жаҳон чемпионатида ҳакамлар ваколатларини кенгайтиради.