Янги судьялар орасида Буюк Британиядан Дапо Аканде, Франциядан Франсуа Алабрун, Иорданиядан Маҳмуд Дайфаллаҳ Ҳмуд, Сингапурдан Рена Ли ва Кениядан Фиби Окова бор.
Сайланган беш номзоддан иккитаси — Маҳмуд Дайфаллаҳ Ҳмуд ва Фиби Окова — амалдаги судьялар бўлиб, қайта сайландилар. Уларнинг барчаси 2027 йил 6 февралдан бошлаб 9 йиллик муддатга хизмат қилади.
Ҳмуд ва Окова илгари бўш судьялик ўринларига сайланган эди. Ҳмуд 2025 йил май ойида 2027 йил 5 февралгача бўлган муддатга тайинланган эди. У Ливан Бош вазири этиб тайинлангани сабабли Халқаро суддан истеъфога чиққан Наваф Саламнинг ўрнини эгаллади. Окова 2025 йил ноябрь ойида истеъфога чиққан Сомали вакили Абдулқавий Аҳмад Юсуф ўрнига сайланди.
БМТнинг асосий суд органи бўлган Халқаро суд низомига кўра, судьялар Хавфсизлик Кенгаши ва Бош Ассамблеяда яширин овоз бериш йўли билан сайланади. Номзод иккала органда ҳам кўпчилик овозни олиши керак. Овозлар бир вақтнинг ўзида, лекин алоҳида ўтказилади.
Бу йил Бош Ассамблея ва Хавфсизлик Кенгаши якуний қарор қабул қилиш учун уч босқичда овоз беришлари керак эди.
Гагада жойлашган БМТ Халқаро суди 15 судьядан иборат. Улар 9 йил муддатга сайланади. Суд ишида узлуксизликни сақлаб қолиш учун ҳар уч йилда 5 судья қайта сайланади. Судьялар иккинчи муддатга сайланиши мумкин. Агар судья ваколат муддати тугашидан олдин вафот этса ёки истеъфога чиқса, унинг ваколат муддатининг қолган қисми учун янги судьяни сайлаш учун фавқулодда овоз бериш ўтказилади.
Халқаро суд таркибига 15 та турли давлат вакиллари кириши керак.
Эслатиб ўтамиз, БМТ 2027-2036 йилларни Халқаро маданият ўн йиллиги деб эълон қилди.