Башоратларга кўра, ҳафта охиригача иссиқлик янада кучаяди ва ҳаво ҳарорати 35–40°C гача кўтарилиши мумкин. Иссиқлик индекси, яъни инсон танасига сезиладиган ҳарорат 105–115°F (40,5–46°C) даражага етиши мумкин.
Хавф остидаги шаҳарлар қаторига Бостон, Нью-Йорк, Филадельфия, Балтимор, Вашингтон, Чикаго, Миннеаполис, Сент-Луис, Нэшвилл, Атланта, Орландо ва Кливленд киради.
Миллий метеорология хизмати маълумотига кўра, душанба куни Чикагода кундузги ҳарорат 33°C бўлган, бироқ у 39°C каби сезилган. Чоршанбагача энг юқори ҳарорат 38–43°C оралиғида бўлиши кутилмоқда. Огайо штати Дейтон шаҳрида эса сезилувчи ҳарорат 38°C ни ташкил этган.
Нью-Йоркда жума куни ҳарорат 35°C гача кўтарилиши, иссиқлик индекси эса 106°F (41,1°C) бўлиши кутилмоқда. Вашингтон ва Роли (Шимолий Каролина штати) шаҳарларида ҳафта охирида ҳарорат 39°C гача чиқиб, иссиқлик индекси мос равишда 108°F (42,2°C) ва 107°F (41,6°C) ни ташкил этади.
Аввалроқ Европадаги иссиқ ҳаво 1300 дан ортиқ инсон ўлимига сабаб бўлгани ҳақида хабар берилган эди.