Жазирама: Италия ва Испанияда қизил даражадаги огоҳлантириш эълон қилинди

ASTANА. Кazinform — Европани қамраб олган жазирама бир қатор мамлакатларда ҳаво ҳарорати 40°С дан ошишига олиб келди, деб хабар беради Euronews.

Шу муносабат билан расмийлар ўта эҳтиёткор бўлишга чақирмоқда, чунки қурғоқчилик, кучли шамол ва жазирама ўрмон ёнғинларига олиб келиши мумкин.

Италиянинг бир қанча ҳудудларида жазирама кунларида айрим турдаги ишларни тақиқлаш масаласи кўриб чиқилмоқда. 29 июнь, якшанба куни мамлакатнинг 21 шаҳрида қизил огоҳлантириш даражаси эълон қилинди. Ушбу чорани жорий этишни режалаштираётган ҳудудлар орасида Лацио, Тоскана, Калабрия, Апулия ва Умбрия бор.

Италия Соғлиқни сақлаш вазирлиги 27 шаҳарнинг 17 тасида иссиқлик хавфи бўйича энг юқори даражадаги огоҳлантиришни эълон қилди. Буларга Рим, Милан ва Неапол киради. Римда сайёҳлар Колизей ва Треви фаввораси ёнидан соя излашди, баъзилари соябон кўтариб, шаҳар фаввораларидан сув ичиш орқали салқинлашмоқчи бўлди. Худди шундай манзаралар Милан ва Неаполда ҳам кузатилган, у ерда кўча сотувчилари аҳоли ва сайёҳларнинг иссиқдан салқинлашига ёрдам бериш учун лимонад сотишган.

Европанинг бошқа қисмларида Испаниянинг миллий метеорология агентлиги АEМEТ июнь ойи рекорд даражадаги энг иссиқ ой бўлиши мумкинлиги ҳақида огоҳлантирди. Севилья ва мамлакат жанубидаги бошқа шаҳарларда ҳаво ҳарорати 42°С гача кўтарилади.

Испания соғлиқни сақлаш идоралари аҳолини жисмоний зўриқишлардан қочиш ва жазирама пайтида сувсиз қолиш ҳақида огоҳлантирди, айниқса кексалар ва болалар каби заиф гуруҳларга эътибор қаратилади.

Мутахассислар жанубий Европада жазирама тўлқинларининг частотаси ва интенсивлиги ортиб бораётганини глобал иқлим ўзгариши билан боғлашмоқда.

Маҳаллий аҳоли ва сайёҳлар иссиқдан ҳимояланиш йўлларини излаётган Греция ва Португалияда ҳам юқори ҳарорат қайд этилган.

Эслатиб ўтамиз, аввалроқ Францияда 2025 йилнинг биринчи иссиқ тўлқини қайд этилгани ҳақида хабар берган эдик.