Ўзбекистонда айрим тоифадаги фуқаролар учун мажбурий эмлаш жорий этилди
ЎР Соғлиқни сақлаш вазирлигининг маълумотларига кўра, «Аҳолининг санитария-эпидемиологик осойишталиги тўғрисида»ги қонунга мувофиқ, юқумли касалликлар ва жамият учун хавфли паразитар касалликларнинг пайдо бўлиши ва тарқалиши ҳодисаси пайтида Ўзбекистон Республикаси Бош давлат санитария шифокорига тегишли санитария ва эпидемияга қарши чоралар тўғрисида қарор қабул қилиш ваколати берилган.
«Қонуннинг 30-моддасида эпидемияга қарши санитария-гигиена тадбирлари ва профилактик эмлаш каби бир қатор тадбирлар кўзда тутилган. Шуни ҳисобга олган ҳолда, Ўзбекистон бош санитария шифокори, Санитария-эпидемиология фаровонлиги ва жамоат саломатлиги хизмати раҳбари Баҳодир Юсупалиев коронавирусга қарши эмлаш мажбуриятини олишга қарор қилди», - дейилади хабарда.
Қарорга биноан, 18 ёшдан катта бўлган фуқароларнинг айрим тоифалари учун уч дозали вакцина билан мажбурий эмлаш белгиланади. Шу билан бирга, 1 сентябргача ушбу шахслар биринчи компонент билан, 1 октябргача – иккинчи, 1 ноябргача – учинчи компонент билан эмланишлари керак.
Мажбурий эмлашдан ўтказиладиган фуқаролар рўйхатига қуйидагилар киради:
- барча турдаги хизмат кўрсатиш муассасаларининг аҳоли билан ўзаро алоқада бўлган ходимлари (почта алоқаси бўлимлари, банклар, лизинг компаниялари, нотариуслар, суғурта компаниялари, гўзаллик салонлари, сартарошхоналар ва бошқалар);
- барча турдаги савдо объектлари ходимлари (озиқ-овқат, уй-рўзғор буюмлари, кийим-кечак дўконлари, дорихоналар ва бошқалар);
- спорт мактаблари ва спорт иншоотлари ходимлари;
- маданий-кўнгилочар муассасалар ва дам олиш масканлари ходимлари;
- меҳмонхоналар, хостеллар, ётоқхоналар ва кемпинглар;
- йўловчиларни ташиш билан шуғулланадиган давлат ва нодавлат ташкилотларининг ходимлари;
- давлат ва нодавлат таълим муассасалари ходимлари;
- ҳарбий хизматчилар;
- умумий овқатланиш корхоналари ходимлари, хусусан, жамоат жойларида, чойхоналарда, тўйхоналарда, кафе ва ресторанларда, шу жумладан озиқ-овқат маҳсулотларини етказиб беришда иштирок этадиган тезкор овқатланиш пунктлари;
- барча турдаги давлат ва нодавлат тиббий-ижтимоий муассасалари ходимлари;
- уй-жой коммунал хўжалиги ходимлари;
- алоқа ва телекоммуникация ходимлари;
- давлат ҳокимияти ва бошқаруви органлари ходимлари;
- ҳуқуқни муҳофаза қилиш органлари ходимлари.
Эслатиб ўтамиз, эпидемиологик вазиятнинг оғирлашиши сабабли 28 июндан бошлаб Ўзбекистонда карантин чоралари кучайтирилди. Республика пойтахтида ва ҳудудларида касалланишнинг барқарор ўсишини ҳисобга олган ҳолда қўшимча covid- марказлари ташкил қилинди.
Муаллиф: Мадибек Жанибеков
