Янги Зеландияга учаётган Boeing 787 тўсатдан пастлаб, 50 киши жароҳат олди

ASTANA. Kazinform – Чилининг LATAM авиакомпаниясига қарашли Boeing 787 Dreamliner самолёти Тасман денгизи узра парвоз қилаётганда тўсатдан пастлаши оқибатида камида 50 киши жабрланди. 12 киши, жумладан уч экипаж аъзоси касалхонага ётқизилган. Бу ҳақда ВВС хабар берди.

Сиднейдан (Австралия) Оклендга (Янги Зеландия) йўл олган LA800 рейси техник носозлик туфайли 100 метр пастга “қулаб кетди”. Носозликнинг аниқ қандай бўлгани ҳақида хабар берилмаган.

"Одамлар хавфсизлик камарини тақмагани учун ўриндиқларидан қулаб тушган", – деди йўловчилардан бири Янги Зеландия радиосига.

“Баъзилари жиддий жароҳат олган. Одамлар жуда қўрқиб кетишди”, – дея тасдиқлади яна бир йўловчи.

Авиакомпаниянинг маълум қилишича, самолёт режага мувофиқ Окленд аэропортига қўнган.

Қўнгандан сўнг самолётга 10 дан ортиқ тез ёрдам машинаси келиб, жароҳатланганларга ёрдам кўрсатди.