Ўзбекистонда тадбиркор аёлларга гаровсиз кредит берилади

TASHKENT. Kazinform - “Оила ва хотин-қизларни қўллаб-қувватлаш тизимини янада такомиллаштириш чора-тадбирлари тўғрисида”ги ЎР президенти қарори (103-сон, 14.03.2025 й.) қабул қилинди, деб хабар беради Kazinform ЎР Адлия вазирлигининг матбуот хизматига таяниб.

Қарорга кўра, 2025 йилда хотин-қизларни қўллаб-қувватлашнинг асосий мақсадли кўрсаткичлари этиб қуйидагилар белгиланди:

• 2 миллион нафар хотин-қизларнинг бандлигини таъминлаш;
• 250 минг нафар хотин-қизларни касб-ҳунар ва тадбиркорликка ўқитиш;
• 250 минг нафар хотин-қизларни олий таълим билан қамраб олиш;
• 50 минг нафар эҳтиёжманд хотин-қизларни санаторийларда соғломлаштириш ҳамда уларда тадбиркорлик кўникмаларини шакллантириш бўйича мотивацион семинарлар ташкил этиш.

“HAMROH” тадбиркор аёлларни қўллаб-қувватлаш дастури доирасида 2025 йил 1 майдан:

• хотин-қизларга “яшил лойиҳалар” ва IT соҳасидаги лойиҳаларни амалга оширишига, шунингдек, камида 5 нафар хотин-қизнинг тадбиркорлигини йўлга қўйишга кўмаклашган 1 минг нафар “устоз” тадбиркорларга 50 миллион сўмгача грант ажратиш йўлга қўйилади;
• ижобий кредит тарихига эга бўлган хотин-қизларга 100 млн сўмгача гаровсиз кредит ажратилади;
• аёл тадбиркорлар томонидан кредит ҳисобидан сотиб олинаётган асбоб-ускуналар етказиб берилгунга қадар “Тадбиркорликни ривожлантириш компанияси” АЖ томонидан кафиллик тақдим этилиши йўлга қўйилади.

Эслатиб ўтамиз, аввалроқ Ўзбекистон Сингапурнинг биотехнология ва регенератив тиббиёт соҳасидаги тажрибасини ўрганаётгани ҳақида хабар берган эдик.