Ўзбекистонда оммавий тартибсизликларни молиялаштирганлар энди жазоланади

TASHKENT. Kazinform – Ўзбекистонда нафақат оммавий тартибсизликларда иштирок этганлар, балки уларни уюштиришга уринган ва моддий ёрдам кўрсатганлар ҳам жазоланади, деб хабар беради Kazinform агентлигининг Ўзбекистондаги мухбири Алихан Асқар.

Жиноят кодексига тегишли ўзгартиришлар Ўзбекистон Президенти Шавкат Мирзиёев томонидан имзоланди.

Ҳужжатга кўра, эндиликда оммавий тартибсизликлар уюштириш мақсадида махсус тайёргарликдан ўтиб, амалий кўникмаларини оширган, қурол, портловчи ва бошқа хавфли моддаларни қўллаш усулларини пухта эгаллаган шахслар жазоланади. Жумладан, улар 300-600 БҲМ миқдорида (4,5-9 миллион тенге орасида бўлиши тахмин қилинмоқда) жарима тўлайдилар, 3 йилгача жамоат ишларига тортиладилар ёки 5-7 йилгача озодликдан маҳрум этиладилар.

Шу билан бирга, режалаштирилган оммавий тартибсизликлар ҳақида ихтиёрий равишда хабар берган гуруҳ аъзолари жиноий жавобгарликдан озод қилинади.

Бундан ташқари, бундай оммавий тартибсизликлар натижасида хусусий ёки давлат мулкига зарар етказилиши, фуқароларнинг соғлиғига зарар етказилиши, ҳуқуқни муҳофаза қилувчи органлар ходимларига қаршилик кўрсатиши кузатилса, айбдорлар 10 йилдан 15 йилгача озодликдан маҳрум этилади.

Эслатиб ўтамиз, ўтган йили Ўзбекистонда содир этилган оғир жиноятлар сони 24 фоизга ошган.

Охирги пайтларда Ўзбекистонда ноқонуний йўл билан бойлик орттирганлар учун жазо чоралари жорий этиш таклиф қилинган.