Ўзбекистонда 22 нафар уюшган жиноий гуруҳ аъзоси, жумладан ММА жангчиси қўлга олинди

Ўзбекистонда 22 нафар уюшган жиноий гуруҳ аъзоси, жумладан ММА жангчиси қўлга олинди
Фото: gazeta.uz

Ўзбекистон бўйлаб жиноий гуруҳларни аниқлаш ва қўлга олиш бўйича кенг кўламли рейдлар ўтказилмоқда. Фарғона вилоятида уюшган жиноий гуруҳнинг 22 нафар аъзоси, шунингдек, ММА жангчиси Хумоюн Тўхтамуродов (“Борз” лақаби билан машҳур) қўлга олинди. Бундан ташқари, уюшган гуруҳ раҳбари ушланди, дея хабар беради Kazinform агентлиги Gazeta.uzга таяниб.

Ўзбекистон бўйлаб “долзарб 40 кун” тарғиботи доирасида криминоген ҳолатни яхшилаш ва жиноятчиликка барҳам бериш бўйича кенг кўламли тезкор-профилактика тадбирлари амалга оширилмоқда. Тадбирлар 21 ноябрдан 31 декабргача давом этади.

Фарғона вилояти ҳуқуқ-тартибот идоралари томонидан 248 нафар фуқаронинг яшаш манзили бўйича ҳамкорликда тезкор-қидирув профилактика тадбирлари, жиноят содир этишга мойил шахслар томонидан содир этилган ҳуқуқбузарликларни аниқлаш бўйича 106 та тадбир ўтказилиб, 66 та жиноятнинг фош этилишига эришилди. Натижада 4,75 кг гиёҳвандлик воситалари, 78 та психотроп ва кучли таъсир этувчи моддалар, 41 та қурол-яроғ, ўқ-дорилар ва тиғли қурол сифатида ишлатилиши мумкин бўлган буюмлар, шунингдек, 45 та компьютер, телефон ва диний адабиётлар олиб қўйилди. Ҳуқуқ-тартибот идоралари томонидан жиноят содир этиб, суд ва терговдан қочиб, қидирувда бўлган 37 нафар шахс қўлга олинди.

– Ўтказилган махсус тадбирлар давомида жиноий гуруҳларга аъзо бўлган ва безорилик қилган 22 нафар шахс қўлга олинди, уларнинг фаолиятига чек қўйилди. Улар орасида аралаш яккакураш билан шуғулланувчи Хумоюн Тўхтамуродов (“Борз” лақабли) ҳам бор эди. 27 ноябрь куни у Қўқон шаҳрида икки кишига тан жароҳати етказган ва воқеа жойидан қочиб кетганидан сўнг қўлга олинган, -деб хабар берди вилоят Ички ишлар бошқармаси.

Шунингдек, Фарғона шаҳрида уюшган жиноий гуруҳга раҳбарлик қилган А.Мамиров воқеа жойида ушланиб, тергов органларига топширилди.

Сўнгги хабарлар