Ўзбекистон Сингапурнинг биотехнология ва регенератив тиббиёт соҳасидаги тажрибасини ўрганмоқда

TASHKENT. Kazinform - Ўзбекистон Республикаси Олий Мажлиси депутатлари, Соғлиқни сақлаш вазирлиги ва Фармацевтика тармоғини ривожлантириш агентлиги экспертларидан иборат делегация Сингарпурнинг ҳужайра технологияларига асосланган биотехнологик маҳсулотлар ишлаб чиқариш бўйича илғор тажрибаси ҳамда соҳадаги қонунчилик амалиётини ўрганиш мақсадида ушбу давлатда бўлди, деб хабар беради Kazinform агентлиги UzAга таяниб.

Ташриф давомида Ўзбекистон вакиллари Сингапур Миллий университети ҳузуридаги Миллий саратон институти (NCIS), Миллий соғлиқни сақлаш университети тизими (NUHS), Ҳужайра терапияси тадқиқоти институти (ACTRIS) каби етакчи илмий ва тиббиёт муассасалари мутахассислари билан музокара олиб борди. Ихтисослашган компаниялар, жумладан “Esco Lifesciences” ва “Gene Oasis” компаниялари фаолияти билан танишди.

Шунингдек, делегация аъзолари Ҳужайра ва ген-ҳужайра терапияси, клиник тадқиқот ва ишлаб чиқариш жараёнини халқаро GMP стандартига мувофиқ ташкил этиш борасидаги тажрибани чуқур ўрганиш имконига эга бўлди. Айни жараёнда соҳани янада ривожлантиришда муҳим аҳамият касб этадиган меъёрий-ҳуқуқий базага алоҳида эътибор қаратилди.

Эгалланган билим, ўзлаштирилган амалиёт Ўзбекистонда регенератив тиббиёт ва биотехнологияни ривожлантириш маркази ташкил этиш учун меъёрий-ҳуқуқий база яратишда қўлланади.

Эслатиб ўтамиз, аввалроқ Ўзбекистонда илк бор видеокапсула эндоскопияси жорий қилингани ҳақида хабар берган эдик.